កងកម្លាំងការពារអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា កងទ័ពអាកាសរបស់ខ្លួន បានវាយប្រហារលើគោលដៅជាង ១៤០ កន្លែង នៅទូទាំងតំបន់ហ្កាហ្សាស្ទ្រីប ក្នុង  រយៈពេល ២៤ ម៉ោង កន្លងមកនេះ។

កងកម្លាំង IDF បានអះអាងថា ទាំងនេះ គឺជាគោលដៅ «ភេរវកម្ម» ដែលរួមមានក្រុមសកម្មប្រយុទ្ធ អគារយោធា ទីតាំងប្រឆាំងរថក្រោះ និងហេដ្ឋារចនាសម្ព័ន្ធផ្សេងទៀត។

ទីភ្នាក់ងារសារព័ត៌មានផ្លូវការរបស់ប៉ាឡេស្ទីន WAFA បានរាយការណ៍ថា មនុស្ស ៥០នាក់ ត្រូវបានសម្លាប់ និង ១៨៤ នាក់ផ្សេងទៀត បានរងរបួសនៅក្នុងតំបន់ហ្កាហ្សាស្ទ្រីប កាលពីថ្ងៃចន្ទ ដែលជាលទ្ធផលនៃការវាយប្រហាររបស់អ៊ីស្រាអែល។

យោងតាម IDF កងកម្លាំងប្រដាប់អាវុធរបស់ខ្លួន បានសម្លាប់ក្រុមសកម្មប្រយុទ្ធ កម្ទេចគ្រឿងផ្ទុះ និងបំផ្លាញអគារនានា ក្នុងទីក្រុងហ្កាហ្សា។

នៅតំបន់ហ្កាហ្សាភាគខាងជើង កងកម្លាំងថ្មើរជើងរបស់ IDF បានវាយលុកទីតាំងសង្កេតការណ៍ ខណៈពេលដែលកងទ័ពជើងទឹក បានបំផ្លាញឃ្លាំងអាវុធ និងអគាររបស់ក្រុមហាម៉ាស។ កងកម្លាំងការពារអ៊ីស្រាអែល បានបន្ថែមថា កងកម្លាំងរបស់ខ្លួន ក៏បានសម្លាប់ក្រុមសកម្មប្រយុទ្ធ នៅភាគខាងត្បូងនៃតំបន់ហ្កាហ្សាស្ទ្រីបផងដែរ៕