ប្រព័ន្ធផ្សព្វផ្សាយរដ្ឋ KCNA នៅថ្ងៃអង្គារ (ទី៣០ ខែកញ្ញា) នេះ បានរាយការណ៍ថា រដ្ឋមន្ត្រីការបរទេសកូរ៉េខាងជើង លោកស្រី Choe Son Hui បាននិយាយថា ជំហរមិនងាករេរបស់ប្រទេសលោកស្រី គឺពង្រឹងទំនាក់ទំនងបន្ថែមទៀតជាមួយប្រទេសចិន។

សារព័ត៌មាន KCNA បានឲ្យដឹងថា ក្នុងអំឡុងពេលបំពេញទស្សនកិច្ច នៅប្រទេសចិន លោកស្រី Choe បានជួបនាយករដ្ឋមន្ត្រីចិន លោក Li Qiang កាលពីថ្ងៃទី២៩ ខែកញ្ញា។ ហើយសារព័ត៌មានមួយនេះបានបន្ថែមថា លោក Li បានប្រាប់លោកស្រីរដ្ខមន្ត្រីការបរទេសរូបនេះថា ប្រទេសចិនបានវាយតម្លៃខ្ពស់ ចំពោះទំនាក់ទំនងជាមួយកូរ៉េខាងជើង ដោយបញ្ជាក់ឡើងវិញនូវជំហររបស់ខ្លួន ក្នុងការលើកកម្ពស់ទំនាក់ទំនងទ្វេភាគី តាមរយៈទស្សនៈយុទ្ធសាស្ត្រ និងរយៈពេលវែង។

ដំណើរទស្សនកិច្ចរបស់លោកស្រី Choe កើតឡើងបន្ទាប់ពីមានជំនួបកំពូលរបស់មេដឹកនាំកូរ៉េខាងជើងលោក Kim Jong Un ជាមួយប្រធានាធិបតីចិន លោក Xi Jinping នៅទីក្រុងប៉េកាំង កាលពីដើមខែកញ្ញា ដែលជាកិច្ចប្រជុំលើកដំបូងក្នុងរយៈពេល ៦ឆ្នាំ។

កូរ៉េខាងជើង និងចិន គឺជាសម្ព័ន្ធមិត្តប្រពៃណី ប៉ុន្តែទំនាក់ទំនងរបស់ប្រទេសមានភាពស្មុគស្មាញ និងតានតឹង នៅពេលខ្លះ៕