អ៊ុយក្រែន នៅថ្ងៃអង្គារ (ទី៣០ ខែកញ្ញា) នេះ បានប្រាប់ឲ្យដឹងថា ការវាយប្រហារដោយយានដ្រូនពេញមួយយប់របស់រុស្សី បានបណ្ដាលឲ្យគ្រួសារមួយមានសមាជិក ៤នាក់បាត់បង់ជីវិតទាំងអស់ នៅតំបន់ Sumy ភាគឦសាន។

លោក Oleg Grygorov ប្រមុខរដ្ឋបាលយោធាក្នុងតំបន់ បាននិយាយថា កងកម្លាំងរុស្ស៊ី បានវាយប្រហារអគារលំនៅឋានមួយ នៅភូមិ Chernechchyna ក្នុងសហគមន៍ Krasnopillia។

លោក Grygorov បានសរសេរនៅលើកម្មវិធីផ្ញើសារ Telegram ថា៖ «ប្តីប្រពន្ធមួយគូដែលមានកូនតូចៗ ២នាក់ បានរស់នៅក្នុងផ្ទះនេះ។ ជារឿងគួរឲ្យសោកស្ដាយពន់ពេក គ្មាននរណាម្នាក់អាចរត់ផុតពីការវាយប្រហារនោះឡើយ»។

លោកបានបន្ថែមថា៖ «ក្រុមអ្នកជួយសង្គ្រោះ បានរកឃើញសាកសពមនុស្ស ៤នាក់ដែលស្លាប់នៅក្រោមគំនរបាក់បែក ដោយមានឪពុកម្តាយ និងកូនប្រុសអាយុ ៦ឆ្នាំនិង ៤ឆ្នាំ»។ នេះជាការបាត់បង់ដ៏គួរឲ្យតក់ស្លុត និងមិនអាចកែប្រែបាន សម្រាប់សហគមន៍ និងតំបន់ទាំងមូល»។

ចំណែកក្រសួងការពារជាតិរុស្ស៊ីវិញ បានប្រាប់ថា ខ្លួនបានស្ទាក់ចាប់ និងបំផ្លាញយានដ្រូនរបស់អ៊ុយក្រែនចំនួន ៨១គ្រឿងពេញមួយយប់។

អភិបាលក្រុង Volgograd លោក Andrey Bocharov បាននិយាយថា យោធារុស្ស៊ីបានទប់ស្កាត់ការវាយប្រហារ «ដ៏ធំ» ដោយយានដ្រូនរបស់អ៊ុយក្រែន លើតំបន់ភាគខាងត្បូង។ ហើយលោក Bocharov បានបញ្ជាក់ថា «យោងទៅតាមព័ត៌មានបឋម បានឲ្យដឹងថា មិនមានការខូចខាតដល់រចនាសម្ព័ន្ធ ឬការរងរបួសនោះឡើយ»៕