​អង់គ្លេស៖ យោង​តាម​របាយការណ៍​បឋម​បញ្ចេញ​កាលពី​ថ្ងៃ​ចន្ទ ពិធីជប់លៀង​នានា​ដែល​បាន​រៀប​ចំនៅ​ឯ​វិមាន​នាយករដ្ឋមន្ត្រី​អង់គ្លេស​លោក Boris Johnson អំឡុង​ការ​បិទ​ខ្ទប់​ទប់ស្កាត់​ការ​ឆ្លង​វីរុស COVID-19 បង្ហាញ​ពី​ការ​បរា​ជ័យ​ក្នុង​ការដឹកនាំ​ប្រទេស ​និង​ការវិនិច្ឆ័យ ហើយ​ពិធីជប់លៀង​មួយ​ចំនួន​មិន​គួរ​ត្រូវ​បាន​អនុញ្ញាត​ឲ្យ​រៀប​ចំ​ឡើយ​។

​មន្ត្រី​ស៊ីវិល​ជាន់ខ្ពស់លោកស្រី Sue Gray ត្រូវ​បាន​តែង​តាំង​ឲ្យ​ទទួលបន្ទុក​ក្នុង​ការ​ស៊ើបអង្កេត​ ការ​ជួបជុំ​ជា​រឿងអាស្រូវ​ដែល​គេ​ហៅថា “Party-Gate” នៅ​វិមាន​នាយករដ្ឋមន្ត្រី​អំឡុង​ឆ្នាំ​២០២០ និង​ឆ្នាំ​២០២១ នៅ​ពេល​ដែល​ចក្រភព​អង់គ្លេស​បាន​អនុវត្តន៍​វិធានការ​រឹតត្បិត​យ៉ាង​តឹងរ៉ឹង លើ​សកម្មភាព​ប្រមូលផ្ដុំ​ទាំង​ក្នុង​ និង​ក្រៅ​តំបន់​។ មានតែ​ផ្នែក​ខ្លះ​នៃរបាយការណ៍​របស់​លោក​ស្រី Gray​ ប៉ុណ្ណោះ​ដែល​បាន​ចេញផ្សាយដោយសារ​ការស៊ើបអង្កេត​ របស់​អង្គភាព​អនុវត្តន៍​ច្បាប់​នៅតែ​បន្ត​ធ្វើ​នៅឡើយលើ​ព្រឹត្តិការណ៍​ចំនួន ១២​ ក្នុងចំណោម​ព្រឹត្តិការណ៍​ចំនួន​ ១៦។

​នៅ​ក្នុង​គំហើញ​របស់​លោក​ស្រី Gray លោកស្រី​បាន​បញ្ជាក់​ថា នគរបាល​ក្រុង​ឡុង​ដ៍​កំពុង​ស៊ើប​អង្កេត​លើ​ព្រឹត្តិការណ៍​ចំនួន​ ១២ នៅ​ពេល​វេលា​ខុស​ពី​គ្នា​ចំនួន ​៨ ជុំវិញ​ការ​ចោទ​ប្រកាន់​ថា ​បាន​បំពាន​ច្បាប់​ទប់ស្កាត់​ការ​ឆ្លង​រា​ល​ដាល​វីរុស Covid-19។ ព្រឹត្តិការណ៍​ទាំងនោះ​បូករួម​ទាំង​ពិធី​ជប់​លៀង ​"bring your own booze" កាលពី​ថ្ងៃទី២០​ ​ខែ​ឧសភា ឆ្នាំ​២០២០ នៅ​សួន​វិមាន​នាយករដ្ឋមន្ត្រី ដែល​លោកនាយក​រដ្ឋមន្ត្រី​បាន​សុំ​អភ័យទោស​ចំពោះ​ការចូលរួម​នោះ និង​កម្មវិធី​ជប់​លៀង​ខួប​កំណើត​របស់​លោក​នាយក​រដ្ឋ​មន្ត្រី​កាលពី​ថ្ងៃ​ទី១៩​ ខែ​មិថុនា ឆ្នាំ២០២០​៕

អត្ថបទ៖ សុខមាន