ភ្នំពេញ ៖ ក្រសួងវប្បធម៌ និងវិចិត្រសិល្បៈ នឹងរៀបចំពិព័រណ៍ “ស្នាដៃមត៌កមនុស្សរស់‍‍” ដែលនឹងបើកជូនទស្សនា ស្វែងយល់ដោយសេរី រយៈពេល០៣ថ្ងៃចាប់ពីថ្ងៃទី៦-៨ ខែតុលា ឆ្នាំ២០២៥ខាងមុខនេះ នៅសារមន្ទីរខ្លែងខ្មែរ ទល់មុខវិមានរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

​លោក រឿង សារ៉េត ប្រធានស្តីទីនាយកដ្ឋានអភិវឌ្ឍន៍វប្បធម៌ ថ្លែងប្រាប់BTV ព័ត៌មាន នាព្រឹកថ្ងៃទី២៩ ខែកញ្ញា ឆ្នាំ២០២៥ថា ពិព័រណ៍ “ស្នាដៃមត៌កមនុស្សរស់‍‍” រៀបចំដោយ អគ្គនាយកដ្ឋានបច្ចេកទេសវប្បធម៌ នាយកដ្ឋានអភិវឌ្ឍវប្បធម៌ សហការឧបត្ថម្ភដោយមីជាតិ និងវីតាល់ មានគោលបំណងលើកតម្កើង និងបង្កើនការយល់ដឹងអំពីបេតិកភណ្ឌវប្បធម៌អរូបី តាមរយៈការតាំងបង្ហាញស្នាដៃ និងទេពកោសល្យជំនាញសិល្បៈវប្បធម៌របស់ព្រឹទ្ធាចារ្យមត៌កមនុស្សរស់។ មត៌កមនុស្សរស់ សំដៅដល់បុគ្គល ឬក្រុមមនុស្សមានចំណេះដឹង ជំនាញ ទេពកោសល្យ និងបច្ចេកទេសកម្រិតខ្ពស់បំផុត ដែលចាំបាច់ដល់ការបង្កើតភាពសម្រិត សម្រាំង នៃទិដ្ឋភាពជីវិតវប្បធម៌របស់ប្រជាជន និងអត្ថិភាពបន្តនូវ បេតិកភណ្ឌ វប្បធម៌ អរូបី របស់ជាតិ។

សូមរំលឹកឡើងវិញថា លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានស្នើដល់មន្រី្តរាជធានី-ខេត្ត ចូលរួមថែរក្សានូវអ្វីដែលជាមរតកជាតិ និងស្នើដល់យុវជន យុវនារីទាំងអស់ ចូលរួមផ្សព្វផ្សាយតាមប្រព័ន្ធបណ្តាញសង្គម ដោយគាំទ្រនូវអ្វីដែលជាវប្បធម៌របស់ខ្មែរ។ បើយើងក្រឡេកមើលប្រទេសជិតខាង និងនៅលើឆាកអន្តរជាតិ ចំណេះដឹងរបស់ដូនតា ដែលបានច្នៃទៅតាមបច្ចេកវិទ្យាថ្មីៗ គឺទទួលនូវការចាប់អារម្មណ៍ខ្លាំងណាស់ ពិព្រោះចំណេះដឹងកាន់តែតិចទៅៗ ទៅតាមការវិវត្តន៍ ប្រសិនបើយើងទាំងអស់គ្នាចេះទាញយកនូវឱកាសនេះ ដោយប្រើប្រាស់នូវបច្ចេកវិទ្យាថ្មីៗ គឺជាឱកាសមួយ ដើម្បីបើកទូលាយខ្លួនឯងផង ទៅកាន់ទីផ្សារផង បង្កើនចំនេះដឹងផង ហើយថែរក្សានូវអ្វីដែលជាមរតកដូនតាផង។ ដូច្នេះប្រធានមនី្ទរវប្បធម៌ និងអង្គភាពវប្បធម៌ ត្រូវមានភារកិច្ចថែរក្សានូវអ្វីដែលជាទំនៀមទំលាប់វប្បធម៌ខ្មែរ។

(១).មរតកមនុស្សរស់

(២).ពង្រឹងនូវអត្តសញ្ញាណរបស់យើងឲ្យនៅជាខ្មែរ

ជាចុងក្រោយលោកជំទាវបណ្ឌិតសភាចារ្យ ភឿង សកុណា បានក្រើនរំលឹកឡើងវិញថា មុននឹងស្គាល់វប្បធម៌បរទេស ត្រូវស្គាល់វប្បធម៌ខ្មែរយើងសិន មុននឹងស្រលាញ់បរទេស ត្រូវស្រលាញ់អ្វីដែលជារបស់ជាតិជាមុនសិន ហើយបើយើងជាខ្មែរមិនចូលរួម របស់ទាំងនោះនឹងបាត់បង់។ ដូច្នេះយើងត្រូវចូលរួមថែរក្សានូវអ្វីដែលជាមរតករបស់ជាតិ៕

អត្ថបទ រដ្ឋា