វិមានក្រឹមឡាំងនិយាយនៅថ្ងៃអង្គារនេះថា ពួកគេសង្ឃឹមថា ផែនការសន្តិភាពហ្កាហ្សារបស់ប្រធានាធិបតីសហរដ្ឋអាមេរិកលោក Donald Trump នឹងត្រូវអនុវត្ត ហើយនិងនាំសន្តិភាពនៅតំបន់មជ្ឈិមបូព៌ា ។

កាលពីថ្ងៃចន្ទម្សិលមិញ លោក Trumpទទួលបានការគាំទ្រពីនាយករដ្ឋមន្រ្តីអ៊ីស្រាអែលលោក Benjamin Netanyahu សម្រាប់សំណើសន្តិភាពគាំទ្រដោយសហរដ្ឋអាមេរិក ដើម្បីបញ្ចប់សង្រ្គាមរយៈពេល ២ឆ្នាំ នៅហ្កាហ្សា ប៉ុន្តែសំនួរបានលេចចេញជារូបរាង សួរថាតើក្រុមហាម៉ាសនឹងព្រមទទួលយកផែនការនេះដែរឬទេ ។

លោក Dmitry Peskovគឺជាអ្នកនាំពាក្យវិមានក្រឹមឡាំងនិយាយថា ពួកយើងពិតជាចង់ឲ្យផែនការរបស់លោក Trumpត្រូវបានអនុវត្ត ហើយពួកយើងសង្ឃឹមថា វានឹងជួយនាំព្រឹត្តការណ៍នៅក្នុងតំបន់មជ្ឈិមបូព៌ាឆ្ពោះទៅរកសន្តិភាព ។

លោកបន្តថា បើសិនជាអ្នកសួរថាតើសហព័ន្ធរុស្ស៊ីនឹងចូលរួមផែនការនេះឬ អត់ទេ វាអត់មានទេ ។ ពុំមានសញ្ញាណាមួយពីអាមេរិកពីរឿងនេះឡើយ ។ ពួកយើងរក្សាការប្រាស្រ័យទាក់ទងរបស់ពួកយើងជាមួយភាគីទាំងអស់នៅក្នុងជម្លោះនេះ ។

គួរឲ្យដឹងថា សេតវិមានបានបញ្ចេញឯកសារមាន ២០ចំណុចដែលអំពាវនាវឲ្យមានបទឈប់បាញ់បន្ទាន់ ការដោះដូរចំណាប់ថ្នូរដែលត្រូវបានចាប់ខ្លួនដោយក្រុមហាម៉ាស សម្រាប់អ្នកទោសប៉ាឡេស្ទីនដែលឃុំឃាំងដោយអ៊ីស្រាអែល ការដកទ័ពអ៊ីស្រាអែលតាមដំណាក់កាលចេញពីតំបន់ហ្កាហ្សា ការរំសាយអាវុធក្រុមហាម៉ាស និងការបង្កើតរដ្ឋាភិបាលអន្តរកាលដឹកនាំដោយស្ថាប័នអន្តរជាតិ ។

គេនៅពុំទាន់ច្បាស់ភ្លាមៗនោះទេថាតើរដ្ឋបាលលោក Trump និងអ៊ីស្រាអែល បានដោះស្រាយការខ្វែងគំនិតគ្នារបស់ពួកគេរួចហើយឬនៅ រួមទាំងលទ្ធភាពនៃអនាគតរដ្ឋប៉ាឡេស្ទីនដែលលោក Netanyahu បានបដិសេធន៍ចោលយ៉ាងខ្លាំងក្លា ហើយនិងតួនាទីណាមួយសម្រាប់អាជ្ញាធរប៉ាឡេស្ទីនក្នុងអភិបាលកិច្ចក្រោយសង្រ្គាមនៅដែនដីបិទច្រកមួយនេះ ៕