រដ្ឋអាជ្ញាបាននិយាយថា នៅថ្ងៃអង្គារនេះ នគរបាលអាល្លឺម៉ង់ បានចាប់ខ្លួនបុរសជនជាតិស៊ីរីម្នាក់ ដែលត្រូវបានគេសង្ស័យថា បានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិរួមទាំងការសម្លាប់ និងការធ្វើទារុណកម្មនៅពេលជាមេដឹកនាំកងជីវពល ក្នុងឆ្នាំ ២០១១ នៅទីក្រុង Aleppo ។

ជនជាតិស៊ីរីដែលត្រូវបានកំណត់អត្តសញ្ញាណថា ជា Anwar S. ស្របតាមច្បាប់ឯកជនភាពរបស់អាល្លឺម៉ង់ ត្រូវបានគេសង្ស័យថា ជាប្រធាន «កងជីវពល shabiha» ដែលត្រូវបានដាក់ពង្រាយនៅទីក្រុង Aleppo ក្នុងនាមអតីតមេដឹកនាំស៊ីរី ក្រោមការដឹកនាំរបស់លោកប្រធានាធិបតី Bashar Assad នៅពេលនោះ។

រដ្ឋអាជ្ញាបាននិយាយថា ក្នុងឱកាសចំនួន៨ នៅចន្លោះខែមេសា និងខែវិច្ឆិកា ឆ្នាំ ២០១១ បន្ទាប់ពីការអធិស្ឋានថ្ងៃសុក្រ ជនសង្ស័យ និងកងជីវពលរបស់ខ្លួន បានវាយប្រហារជនស៊ីវិលដោយដំបង បំពង់ដែក និងឧបករណ៍ផ្សេងទៀត ដើម្បីបំបែកការតវ៉ា។ ពួកគេបានបន្ថែមនៅក្នុងសេចក្តីថ្លែងការណ៍មួយថា ការឆក់ដោយចរន្តអគ្គិសនី ត្រូវបានគេជឿថា ត្រូវបានប្រើប្រាស់ផងដែរ។

រដ្ឋអាជ្ញាបាននិយាយថា អ្នកតវ៉ាមួយចំនួន ត្រូវបានប្រគល់ទៅឲ្យនគរបាល និងអាជ្ញាធរស៊ើបការណ៍ ហើយខណៈពេលដែលត្រូវបានឃុំខ្លួន ទទួលរងនូវការរំលោភបំពានយ៉ាងធ្ងន់ធ្ងរ។

សារព័ត៌មានរ៉យទ័រ មិនអាចទាក់ទងមេធាវីរបស់លោក Anwar S. ភ្លាមៗ ដើម្បីសុំការអត្ថាធិប្បាយបានទេ៕