ប្រធានាធិបតីវ៉េណេស៊ុយអេឡា លោក Nicolas Maduro កាលពីថ្ងៃចន្ទ (ទី២៩ ខែកញ្ញា) បានប្រាប់ឲ្យដឹងថា លោកបានត្រៀមខ្លួនរួចជាស្រេច ដើម្បីប្រកាសដាក់រដ្ឋគ្រាអាសន្ន ដោយសារការគំរាម «លុកលុយ» ពីសំណាក់សហរដ្ឋអាមេរិក បន្ទាប់ពីមានការវាយប្រហារបណ្ដាលឲ្យមានអ្នកស្លាប់ជាបន្តបន្ទាប់របស់សហរដ្ឋអាមេរិកទៅលើទូកដែលសង្ស័យថា ជាការដឹកគ្រឿងញៀនរបស់វ៉េណេស៊ុយអេឡា។

នៅក្នុងសុន្ទរកថាតាមទូរទស្សន៍ លោក Maduro បាននិយាយថា៖ «ពេលនេះ ដំណើរការពិគ្រោះយោបល់បានចាប់ផ្តើម ដើម្បីប្រកាសគ្រាអាសន្នស្របតាមរដ្ឋធម្មនុញ្ញ និងការពារប្រជាជនរបស់យើង សន្តិភាព និងស្ថិរភាពរបស់យើង ប្រសិនបើប្រទេសវ៉េណេស៊ុយអេឡាត្រូវបានវាយប្រហារដោយចក្រភពអាមេរិក ដែលជាការវាយប្រហារដោយយោធា»។

នៅព្រឹកថ្ងៃដដែល អនុប្រធានាធិបតី លោកស្រី Delcy Rodriguez បានប្រាប់អ្នកការទូតបរទេសថា លោក Maduro បានចុះហត្ថលេខាលើក្រឹត្យមួយដែលផ្តល់ឲ្យលោកនូវ «អំណាចពិសេស» ក្នុងនាមជាប្រមុខរដ្ឋ ដើម្បីចាត់វិធានការ លើវិស័យការពារជាតិ និងសន្តិសុខ ក្នុងករណីដែលសហរដ្ឋអាមេរិក «ហ៊ានវាយប្រហារមាតុភូមិរបស់យើង»។

តែយ៉ាងណាក្ដី ប្រភពរដ្ឋាភិបាលមួយ បានប្រាប់សារព័ត៌មានមួយថា លោក Maduro មិនទាន់បានចុះហត្ថលេខាលើឯកសារនេះនៅឡើយទេ។ ដោយនិយាយក្នុងលក្ខខណ្ឌមិនបញ្ចេញឈ្មោះ ប្រភពនោះបានបញ្ជាក់ថា៖ «អនុប្រធានាធិបតីបានបង្ហាញឯកសារ ដើម្បីបង្ហាញថា អ្វីៗបានត្រៀមរួចរាល់ហើយ ហើយថាប្រធានាធិបតីអាចចេញក្រឹត្យបានគ្រប់ពេល»។

គួរបញ្ជាក់ថា ប្រធានាធិបតីអាមេរិក លោក Donald Trump បានដាក់ពង្រាយនាវាចម្បាំងចំនួន ៨គ្រឿង និងនាវាមុជទឹកដើរដោយថាមពលនុយក្លេអ៊ែរ នៅភាគខាងត្បូងតំបន់ការ៉ាអ៊ីប ជាផ្នែកមួយនៃផែនការដែលត្រូវបានថា ជាការប្រយុទ្ធប្រឆាំងនឹងការជួញដូរគ្រឿងញៀន ប៉ុន្តែវាហាក់ដូចជាមានគោលបំណងជាពិសេសក្នុងការដាក់សម្ពាធលើលោក Maduro។ កងកម្លាំងសហរដ្ឋអាមេរិក បានបំផ្លាញទូកសង្ស័យដឹកគ្រឿងញៀនយ៉ាងតិចចំនួន ៨គ្រឿង នៅសមុទ្រការ៉ាអ៊ីប ក្នុងប៉ុន្មានសប្តាហ៍ថ្មីៗនេះ ដោយបានបណ្ដាលឲ្យមនុស្សយ៉ាងតិច ១៤នាក់ស្លាប់៕