នៅថ្ងៃអង្គារនេះ បាតុកររាប់ពាន់នាក់ បាននាំគ្នាដង្ហែរក្បួនតាមដងផ្លូវ រយៈពេល ១ថ្ងៃក្រោយប្រធានាធិបតីរំលាយរដ្ឋាភិបាលរបស់លោក បន្ទាប់ពីបាតុករប្រឆាំងនឹងការកាត់ផ្តាច់ទឹក និងថាមពល ។

អង្គការសហប្រជាជាតិ(UN) បាននិយាយថា មនុស្សយ៉ាងហោច ២២នាក់ ត្រូវបានសម្លាប់ និងមនុស្សជាង ១០០នាក់ផ្សេងទៀត រងរបួស នៅក្នុងបាតុកម្មកាលពីថ្ងៃចន្ទ និងសប្តាហ៍មុន ។

ទោះបីជាយ៉ាងណាក៏ដោយ ក្រសួងការបរទេសម៉ាដាហ្គាស្កា ច្រានចោលតួលេខគ្រោះថ្នាក់នេះ ដោយពួកគេនិយាយថា ទិន្នន័យពុំទទួលបានពីក្រុមអាជ្ញាធរជាតិនោះទេ ហើយវាផ្អែកលើពាក្យចចាមអារ៉ាម និងព័ត៌មានមិនពិតប៉ុណ្ណោះ ។

រូបភាពវីដេអូឃ្លីបរបស់ទូរទស្សន៍ឯកជន Real TV Madagasikara នៅថ្ងៃអង្គារនេះ ឃើញក្រុមបាតុករនាំគ្នាដង្ហែរក្បួននៅតាមដងផ្លូវនានា នៅក្នុងទីក្រុង Antananarivo កាន់បដាមានសរសេរពាក្យដូចជា “ពួកយើងត្រូវការទឹក ពួកយើងត្រូវការអគ្គិសនី លោក Rajoelina ត្រូវតែចាកចេញ” ។

បំផុសគំនិតដោយបាតុកម្ម “Gen Z”ដឹកនាំដោយក្រុមយុវជននៅកេនយ៉ា និងនេប៉ាល់ បាតុកម្មរយៈពេល ៣ថ្ងៃកន្លងមកនេះ បានក្លាយជាការតវ៉ាទ្រង់ទ្រាយធំបំផុត ពុំធ្លាប់ដែលមើលឃើញនៅប្រទេសកោះក្នុងមហាសមុទ្រឥណ្ឌាមួយនេះ នារយៈពេលជាច្រើនឆ្នាំកន្លងមកនេះ ហើយវាបានក្លាយជាការលំបាកដ៏ធ្ងន់ធ្ងរបំផុតមួយដែលលោកប្រធានាធិបតី Andry Rajoelina បានប្រឈម ចាប់តាំងពីការឈ្នះឆ្នោតឡើងវិញរបស់លោកកាលពីឆ្នាំ ២០២៣ ។

លោក Rajoelina បានឡើងកាន់អំណាចដំបូងនៅក្នុងរដ្ឋប្រហារឆ្នាំ ២០០៩ ហើយក្រោយមកនៅឆ្នាំ ២០១៤ លោកបានលាលែងពីតំណែង ប៉ុន្តែលោកបានក្លាយជាប្រធានាធិបតីម្តងទៀត ក្រោយឈ្នះការបោះឆ្នោតឆ្នាំ ២០១៨ ហើយនិងទទួលបានអាណត្តិទី ៣របស់លោក នៅការបោះឆ្នោតកាលពីខែធ្នូ ឆ្នាំ ២០២៣ ដែលគូប្រជែងរបស់លោកនិយាយថា កើតមានភាពមិនប្រក្រតី ៕