រដ្ឋាភិបាលឆ្វេងនិយមរបស់ប្រទេសអេស្ប៉ាញ បានឲ្យដឹងនៅថ្ងៃអង្គារ (ទី៣០ ខែកញ្ញា) នេះថា ខ្លួននឹងស៊ើបអង្កេតក្រុមហ៊ុនដែលផ្សាយពាណិជ្ជកម្មផលិតផល ឬសេវាកម្មនៅក្នុងប្រទេស ដែលមានប្រភពនៅក្នុងដែនដីដីប៉ាឡេស្ទីនដែលត្រូវបានកាន់កាប់ដោយអ៊ីស្រាអែល។

ក្រសួងអ្នកប្រើប្រាស់ បានឲ្យដឹងនៅក្នុងសេចក្តីថ្លែងការណ៍មួយថា វិធានការនេះ ធ្វើឡើងបន្ទាប់ពីមានការអនុម័តលើក្រឹត្យមួយ កាលពីសប្តាហ៍មុន ដែលហាមឃាត់ការផ្សព្វផ្សាយទំនិញ និងសេវាកម្មបែបនេះ នៅក្នុងប្រទេសអេស្ប៉ាញ ដើម្បីទប់ស្កាត់ក្រុមហ៊ុនកុំឲ្យទទួលបានអត្ថប្រយោជន៍ពីការកាន់កាប់នេះ។

ក្រឹត្យនោះ គឺជាផ្នែកមួយនៃកញ្ចប់វិធានការដែលរួមបញ្ចូលទាំងការដាក់ទណ្ឌកម្មអាវុធលើអ៊ីស្រាអែលដែលមានបំណងបញ្ឈប់នូវអ្វីដែលនាយករដ្ឋមន្ត្រី លោក Pedro Sanchez ចាត់ទុកថា «អំពើប្រល័យពូជសាសន៍ នៅតំបន់ហ្កាហ្សា»។

រដ្ឋមន្ត្រីក្រសួងកិច្ចការអ្នកប្រើប្រាស់ Pablo Bustinduy បាននិយាយនៅដើមឆ្នាំនេះ ការិយាល័យរបស់លោកនឹងប្រើប្រាស់ «ធនធានចាំបាច់ទាំងអស់» ដើម្បីធានាបានថា គ្មានក្រុមហ៊ុនណាដែលប្រតិបត្តិការនៅក្នុងប្រទេសអេស្ប៉ាញទទួលបានប្រាក់ចំណេញពីការកាន់កាប់នេះជាដាច់ខាត។

សេចក្តីថ្លែងការណ៍បានដកស្រង់សម្តីរបស់លោក Bustinduy ដែលបាននិយាយថា៖ «គ្មានក្រុមហ៊ុនណា គួរមានតារាងតុល្យការរបស់ខ្លួនប្រឡាក់ដោយឈាមនៃប្រជាជនប៉ាឡេស្ទីននោះទេ»។

អង្គការសហប្រជាជាតិកាលពីថ្ងៃសុក្រចុងសប្ដាហ៍កន្លងមក បានចេញផ្សាយការធ្វើបច្ចុប្បន្នភាពនៃមូលដ្ឋានទិន្នន័យអំពីក្រុមហ៊ុន ដែលមានសកម្មភាពនៅកន្លែងតាំងទីលំនៅរបស់អ៊ីស្រាអែល ក្នុងដែនដីប៉ាឡេស្ទីន ដោយបានចុះបញ្ជី ១៥៨ក្រុមហ៊ុន មកពីប្រទេសចំនួន ១១។ ប៉ុន្តែក្រុមហ៊ុនមួយ ក្នុងចំណោមក្រុមហ៊ុនអេស្ប៉ាញ គឺក្រុមហហ៊ុនសំណង់ ACS បានស្នើសុំយ៉ាងឆាប់រហ័សឲ្យដកខ្លួនចេញពីបញ្ជី ដោយប្រាប់ថា ខ្លួនបានលក់ក្រុមហ៊ុនបុត្រសម្ព័ន្ធរបស់ខ្លួន នៅឆ្នាំ២០២១ គឺ SEMI ដែលប្រតិបត្តិការនៅអ៊ីស្រាអែល៕