អ៊ីតាលី និងបារ៉ែន កាលពីថ្ងៃចន្ទ (ទី២៩ ខែកញ្ញា) បានឲ្យដឹងថា ប្រទេសទាំង២ បានចុះហត្ថលេខាលើអនុស្សរណៈនៃការយោគយល់គ្នា (MOU) ក្នុងគោលបំណងលើកកម្ពស់ការវិនិយោគ និងពាណិជ្ជកម្មដែលមានតម្លៃជាង ១ពាន់លានអឺរ៉ូ (១,២ពាន់លានដុល្លារ)។ នេះបើយោងតាមសេចក្តីថ្លែងការណ៍រួមពីភាគីទាំង២។

សេចក្តីថ្លែងការណ៍បានឲ្យដឹងថា អនុស្សរណៈនេះត្រូវបានប្រកាសបន្ទាប់ពីមានកិច្ចប្រជុំនៅទីក្រុងរ៉ូម រវាងនាយករដ្ឋមន្ត្រីអ៊ីតាលី លោកស្រី Giorgia Meloni និងរាជទាយាទបារ៉ែន គឺព្រះអង្គម្ចាស់ Salman bin Hamad Al Khalifa។

អនុស្សរណៈនេះ «នឹងលើកកម្ពស់ទំនាក់ទំនងសេដ្ឋកិច្ច ហើយបង្កើនពាណិជ្ជកម្ម និងការវិនិយោគ ដោយមានភាពជាដៃគូដែលប្តេជ្ញាចិត្តក្នុងការវិនិយោគលើសពី ១ពាន់លានអឺរ៉ូ» ខណៈដែលភាគីទាំង២ បានព្រមព្រៀងគ្នាជំរុញទំនាក់ទំនងលើវិស័យនានា ក្នុងនោះរួមទាំងថាមពល និងការពារជាតិផងដែរ។

ជាមួយគ្នានេះ ប្រទេសទាំង២ ក៏បានអំពាវនាវឲ្យបញ្ចប់សង្គ្រាម នៅតំបន់ហ្កាហ្សា និងការដោះលែងចំណាប់ថ្នូរអ៊ីស្រាអែលទាំងអស់ដែលនៅតែត្រូវបានក្រុមហាម៉ាសឃុំខ្លួន ខណៈពេលដែលក៏ថ្កោលទោសដែរ ចំពោះ «សកម្មភាពជាឯកតោភាគី ឬការបង្កអំពើហិង្សាណាមួយ នៅក្នុងតំបន់ West Bank»៕