សារព័ត៌មានបារាំង Le Parisien នៅថ្ងៃអង្គារ (ទី៣០ ខែកញ្ញា) នេះ បានរាយការណ៍ថា ឯកអគ្គរដ្ឋទូតអាហ្វ្រិកខាងត្បូង ប្រចាំនៅប្រទេសបារាំង គឺលោក Nkosinathi Emmanuel Mthethwa ត្រូវបានប្រទះឃើញស្លាប់ នៅក្នុងទីក្រុងប៉ារីស ។

លោក Mthethwa ត្រូវបានគេជឿថា បានលោតពីលើជាន់ទី២២ នៃសណ្ឋាគារ Hyatt Hotel ក្នុងសង្កាត់ទី១៧ នៃទីក្រុងប៉ារីស។ ហេតុផលនានាកំពុងត្រូវបានស៊ើបអង្កេត។ អ្នកនាំពាក្យនគរបាលក្រុងប៉ារីស បដិសេធមិនធ្វើអត្ថាធិប្បាយអ្វីឡើយ។ ហើយការទូរសព្ទទៅស្ថានទូតអាហ្វ្រិកខាងត្បូង ក៏មិនមានអ្នកឆ្លើយតបនោះដែរ។

គួរបញ្ជាក់ថា លោក Mthethwa បានចាប់ផ្តើមកាន់តំណែងជាឯកអគ្គរដ្ឋទូត នៅខែកុម្ភៈ ឆ្នាំ២០២៤ ហើយក៏បានបម្រើការជាគណៈប្រតិភូអចិន្ត្រៃយ៍របស់ប្រទេស ប្រចាំអង្គការយូណេស្កូ (UNESCO)។

ជាមួយគ្នានេះ លោកធ្លាប់កាន់តំណែងជារដ្ឋមន្ត្រីមួយចំនួន ក្នុងនោះរួមមានទាំងផ្នែកកីឡា សិល្បៈ និងវប្បធម៌ ព្រមទាំងនៅក្រសួងនគរបាល ក្រសួងសុវត្ថិភាព និងសន្តិសុខ និងតួនាទីផ្សេងទៀត នៅក្នុងរដ្ឋាភិបាល៕