ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅថ្ងៃអង្គារ (ទី៣០ ខែកញ្ញា) នេះថា អ៊ុយក្រែនបានបញ្ជូនក្រុមអ្នកឯកទេសសង្គ្រាមប្រឆាំងយានដ្រូនទៅកាន់ប្រទេសដាណឺម៉ាក ដើម្បី «ធ្វើសមយុទ្ធ» ខណៈដែលទីក្រុង Copenhagen រៀបចំធ្វើជាម្ចាស់ផ្ទះទទួលមេដឹកនាំអឺរ៉ុប ស្របពេលមានការចោទប្រកាន់ថា មានការរំលោភដែនអាកាសនៅអឺរ៉ុប ពីសំណាក់រុស្ស៊ី។

ដោយឡែក នាយករដ្ឋមន្ត្រីប៉ូឡូញ លោក Donald Tusk បាននិយាយថា ទាហានប៉ូឡូញក៏នឹងធ្វើដំណើរទៅកាន់ដាណឺម៉ាកផងដែរ ដើម្បីជួយធានាសន្តិសុខដល់កិច្ចប្រជុំមេដឹកនាំសហភាពអឺរ៉ុប (EU) នាពេលខាងមុខ និងកិច្ចប្រជុំកំពូលសហគមន៍នយោបាយអឺរ៉ុប។

គួរបញ្ជាក់ថា ការប្រទះឃើញយានដ្រូនអាថ៌កំបាំង នៅទូទាំងប្រទេសដាណឺម៉ាក ចាប់តាំងពីថ្ងៃទី២២ ខែកញ្ញា បាននាំឲ្យមានការបិទអាកាសយានដ្ឋាន និងក្ដីកង្វល់ផ្នែកសន្តិសុខ នៅមុនកិច្ចប្រជុំ ដោយកំហុសត្រូវបានទម្លាក់ទៅទីក្រុងមូស្គូ ជាការចោទប្រកាន់ដែលត្រូវបានបដិសេធ។ ការរំលោភបំពាននេះ រួមមានទាំងការលុកលុយដ៏ធំពីយានដ្រូន នៅប៉ូឡូញ និងពីយន្តហោះចម្បាំងក្នុងដែនអាកាសរបស់អេស្តូនី។

អ៊ុយក្រែនបានប្រឈមនឹងការវាយប្រហារដោយយានដ្រូន និងមីស៊ីលរបស់រុស្ស៊ី សម្រាប់សង្គ្រាមរយៈពេល ៣ឆ្នាំកន្លះដែលរុស្ស៊ីបានចាប់ផ្តើមក្នុងខែកុម្ភៈ ឆ្នាំ២០២២។

យ៉ាងណាក្ដី លោក Zelenskyy បានឲ្យដឹងតាមរយៈការបង្ហោះនៅលើបណ្ដាញសង្គមថា «ក្រុមអ្នកឯកទេសរបស់យើង បានចាប់ផ្តើមបេសកកម្ម នៅក្នុងប្រទេសដាណឺម៉ាក ដើម្បីចែករំលែកបទពិសោធន៍របស់អ៊ុយក្រែន ក្នុងការប្រឆាំងនឹងយានដ្រូន» ដោយលោកបញ្ជាក់ថា ក្រុមនឹងចូលរួមក្នុងសមយុទ្ធរួមគ្នា ជាមួយសម្ព័ន្ធមិត្ត និងបានបន្ថែមថា «បទពិសោធន៍របស់អ៊ុយក្រែន គឺពាក់ព័ន្ធបំផុត នៅអឺរ៉ុបនាពេលបច្ចុប្បន្ននេះ»។

លោកបានប្រាប់ទៀតថា «ហើយវាច្បាស់ណាស់អ្នកជំនាញរបស់យើង អ្នកឯកទេសរបស់យើង និងបច្ចេកវិទ្យារបស់យើង ដែលអាចក្លាយជាធាតុសំខាន់នៃជញ្ជាំងការពារយានដ្រូនរបស់អឺរ៉ុប នាពេលអនាគត ជាគម្រោងខ្នាតធំដែលនឹងធានាសុវត្ថិភាពនៅលើផ្ទៃមេឃ»៕