អង់គ្លេសនឹងប្រឈមភ្លៀងធ្លាក់ និងខ្យល់បក់ខ្លាំង ស្របពេលដែលព្យុះកំណាចចំនួន ២ បោកបក់ឆ្លងកាត់មហាសមុទ្រអាត្លង់ទិក ។

ការិយាល័យឧតុនិយមអង់គ្លេស បានចេញការព្រមានភ្លៀងធ្លាក់កម្រិតពណ៌លឿងរយៈពេល ៣៧ម៉ោងសម្រាប់តំបន់ភាគខាងលិចស្កុតលែន ចាប់ពីវេលាម៉ោង ៥ល្ងាចថ្ងៃពុធស្អែក រហូតដល់ម៉ោង ៦ព្រឹកថ្ងៃសុក្រ ស្របពេលបង្ហាញក្តីបារម្ភថា ភូមិជាច្រើនកន្លែងអាចនឹងត្រូវកាត់ផ្តាច់ ។

ក្រុមព្យាករណ៍ឧតុនិយម បានព្រមានអ្នកស្រុកថា ភ្លៀងធ្លាក់ខ្លាំងតាមការរំពឹងអាចនឹងមានរហូតដល់ ២៥០មីលីម៉ែត្រ អំឡុងពេលនោះ ។

ប៉ុន្តែការិយាល័យឧតុនិយមព្រមានថា ការប្រកាសអាសន្នអាចនឹងបន្តដល់តំបន់ជាច្រើនទៀតរបស់អង់គ្លេស ពេលដែលព្យុះកំណាច Humberto និង Imelda ធ្វើដំណើរមកដល់នាចុងសប្តាហ៍នេះ ។

សូមបញ្ជាក់ថា ព្យុះ Imelda ដែលបច្ចុប្បន្នត្រូវបានគេចាត់ថ្នាក់ថាជាព្យុះត្រូពិក បានវាយប្រហារតំបន់ការ៉ាអ៊ីប កាលពីថ្ងៃចន្ទម្សិលមិញ ក្នុងនោះក្រុមអាជ្ញាធរនៅបាហាម៉ាស បានបិទសាលារៀនភាគច្រើន ហើយមនុស្ស ២នាក់ បានស្លាប់នៅក្នុងប្រទេសគុយបា ៕