ឥស្សរជនជាន់ខ្ពស់របស់ក្រុមហាម៉ាសបានប្រាប់ទូរទស្សន៍ BBC ថាក្រុមនេះទំនងជានឹងបដិសេធផែនការសន្តិភាពរបស់លោក Donald Trump សម្រាប់ដែនដីហ្កាហ្សា ដោយនិយាយថានោះបម្រើផលប្រយោជន៍របស់អ៊ីស្រាអែលនិងមិនអើពើដល់ប្រជាជនប៉ាឡេស្ទីន ។  

សេតវិមានបានចេញផ្សាយឯកសារ ២០ ចំណុចដែលអំពាវនាវឱ្យមានបទឈប់បាញ់ជាបន្ទាន់ ការដោះដូរចំណាប់ខ្មាំងដែលក្រុមហាម៉ាសឃុំខ្លួនជាថ្នូរនឹងអ្នកទោសប៉ាឡេស្ទីនដែលអ៊ីស្រាអែលឃុំឃាំង ការដកទ័ពអ៊ីស្រាអែលចេញពីតំបន់ហ្កាហ្សាជាដំណាក់កាល ការរំសាយអាវុធរបស់ក្រុមហាម៉ាស និងរដ្ឋាភិបាលអន្តរកាលដែលដឹកនាំដោយស្ថាប័នអន្តរជាតិមួយ។ 

មន្ត្រីខាងលើបាននិយាយថា ក្រុមហាម៉ាស ទំនងជាមិនយល់ព្រមក្នុងការរំសាយអាវុធ និងប្រគល់អាវុធរបស់ពួកគេ ដែលជាលក្ខខណ្ឌសំខាន់នៃផែនការរបស់លោក Trump នោះទេ។ ក្រុមហាម៉ាស ក៏ត្រូវបានគេនិយាយថានឹងជំទាស់នឹងការដាក់ពង្រាយកងកម្លាំងស្ថិរភាពអន្តរជាតិ (ISF) នៅក្នុងតំបន់ហ្កាហ្សា ដែលខ្លួនចាត់ទុកថាជាទម្រង់ថ្មីនៃការកាន់កាប់ផងដែរ។

នាយករដ្ឋមន្ត្រីអ៊ីស្រាអែល លោក Benjamin Netanyahu បានទទួលយកផែនការរបស់លោក Trump ក្នុងអំឡុងពេលកិច្ចពិភាក្សានៅសេតវិមានកាលពីថ្ងៃចន្ទសប្ដាហ៍នេះ។ ក្រុមហាម៉ាស ពុំទាន់បានផ្តល់ការឆ្លើយតបជាផ្លូវការនៅឡើយទេ។

ក្រសួងការបរទេសកាតាបាននិយាយថា ក្រុមហាម៉ាស កំពុងសិក្សាសំណើរបស់សេតវិមានប្រកបដោយការទទួលខុសត្រូវ។មន្ត្រីជាន់ខ្ពស់ប៉ាឡេស្ទីន ដែលបានដឹងពីកិច្ចពិភាក្សារបស់ក្រុមហាម៉ាស បានប្រាប់ទូរទស្សន៍ BBC ថា ការជជែកទាំងនោះ ពាក់ព័ន្ធនឹងការដឹកនាំរបស់ក្រុមនេះ ទាំងក្នុង និងក្រៅតំបន់ហ្កាហ្សា។លោក Trump និយាយថា ផែនការសន្តិភាពហ្កាហ្សាគឺជារឿងក៏គួរឲ្យចាប់អារម្មណ៍ ខណៈដលោកបានដាក់ឱសានវាទចន្លោះពី បីទៅបួនថ្ងៃសម្រាប់ក្រុមហាសក្នុងការឆ្លើយតប។លោកថា វានឹងក្លាយជារឿងគួរឲ្យសោកស្ដាយបើក្រុមហាម៉ាសបដិសេធកិច្ចព្រមព្រៀងនេះ លោកថាបើការងារនេះបរាជ័យ លោកនឹងមានផែនការ A+មួយទៀត៕