ប្រធានាធិបតីអាមេរិក លោក Donald Trump បាននិយាយកាលពីថ្ងៃអង្គារ (៣០ កញ្ញា) ថា លោកចង់ប្រើប្រាស់ទីក្រុងនានារបស់សហរដ្ឋអាមេរិក ធ្វើជា "កន្លែងហ្វឹកហាត់" សម្រាប់យោធា។ ក្នុងសុន្ទរកថាមិនធម្មតាមួយទៅកាន់មេដឹកនាំយោធារាប់រយនាក់ ដែលប្រមូលផ្តុំមកពីជុំវិញពិភពលោក លោក Trump បានពណ៌នា "ការរំខានស៊ីវិល" ថាជា "សត្រូវផ្ទៃក្នុង"។ លោកបន្ថែមថា ស្ថានការណ៍ “នឹងមិនអាចគ្រប់គ្រងបានទេនៅពេលដែលពាក់ព័ន្ធរួចទៅហើយនោះ” ដោយមិនបញ្ចាក់លម្អិតអញវីឡើយ។

ប្រធានាធិបតីអាមេរិករូបនេះបានរិះគន់ម្តងហើយម្តងទៀតចំពោះទីក្រុងដែលដឹកនាំដោយគណបក្សប្រជាធិបតេយ្យ រួមមាន San Francisco, Chicago, New York និង Los Angeles ជាដើម ហើយបានបង្ហើបថា លោកនឹងបន្តគោលនយោបាយរបស់លោកក្នុងការប្រើប្រាស់យោធាសម្រាប់អនុវត្តច្បាប់។

ការលើកឡើងរបស់លោក Trump នោះបានកើតឡើងបន្ទាប់ពីលោកដាក់ពង្រាយកងទ័ពឆ្មាំជាតិទៅកាន់ទីក្រុង Washington DC, Los Angeles និង Portland នៃរដ្ឋ Oregon ក្នុងការបង្រ្កាបឧក្រិដ្ឋកម្ម និងដើម្បីគាំទ្រដល់ការអនុវត្តច្បាប់អន្តោប្រវេសន៍។

រដ្ឋមន្ត្រីក្រសួងការពារជាតិ លោក Pete Hegseth ក៏បាននិយាយនៅក្នុងជំនួបដ៏កម្រនោះផងដែរ ដោយប្រកាសបញ្ចប់វប្បធម៌ "ភ្ញាក់ខ្លួន" នៅមន្ទីរបញ្ចកោណ និងប្រកាសស្តង់ដារ "កម្រិតបុរស" ថ្មីសម្រាប់មន្ត្រីយោធា។ លោក Hegseth និយាយថា យោធាអាមេរិកនឹងតម្រូវឱ្យយុទ្ធជនបំពេញតាម "ស្តង់ដារបុរសខ្ពស់បំផុត" នៅក្នុងការធ្វើតេស្តកាយសម្បទា៕