រូបភាពពីផ្កាយរណបបានបង្ហាញថា កូរ៉េខាងជើង អាចនឹងរៀបចំក្បួនដង្ហែរយោធាទ្រង់ទ្រាយធំ ដើម្បីប្រារព្ធខួបលើកទី៨០ នៃការបង្កើតគណបក្សពលករ ដែលកំពុងកាន់អំណាច នៅថ្ងៃទី១០ ខែតុលា ខាងមុខ នេះបើយោងតាមប្រព័ន្ធផ្សព្វផ្សាយ NHK របស់ជប៉ុន។

NHK បានវិភាគរូបភាពអាកាសយានដ្ឋាន Mirim នៅជិតទីក្រុងព្យុងយ៉ាង ពីបណ្ដាញផ្កាយរណប Planet Labs PBC ដែលមានមូលដ្ឋាននៅសហរដ្ឋអាមេរិក។ អាកាសយានដ្ឋាននោះត្រូវរាយការណ៍ ជាទីតាំងប្រើសម្រាប់ការហាត់សមក្បួនដង្ហែយោធា។ រូបភាពមួយដែលថតនៅថ្ងៃទី១៤ ខែកញ្ញា បង្ហាញឱ្យឃើញកងទ័ពកំពុងហាត់សមរៀបជាក្បួន និងរថយន្តយោធាជាច្រើនតម្រង់ជួរនៅជិតនោះ។ រូបភាពមួយសន្លឹកទៀត ថតនៅថ្ងៃទី២៧ ខែកញ្ញា ក៏បង្ហាញឱ្យឃើញរថយន្តយោធាផងដែរ។

អ្នកជំនាញកិច្ចការយោធាកូរ៉េខាងជើង នៅវិទ្យាស្ថាន Asan សម្រាប់ការសិក្សាគោលនយោបាយរបស់កូរ៉េខាងត្បូង ឈ្មោះ Yang Uk ដែលវិភាគរូបភាពទាំងនេះ បានលើកឡើងថា យានយោធារាប់រយគ្រឿង រួមទាំងឧបករណ៍បាញ់មីស៊ីលចល័ត ហាក់ដូចជាកំពុងរៀបចំសម្រាប់ការហាត់សមនោះ។ កូរ៉េខាងជើងត្រូវបានរំពឹងថានឹងរៀបចំព្រឹត្តិការណ៍ធំៗជាបន្តបន្ទាប់សម្រាប់ខួប ដែលប្រារព្ធរៀងរាល់ ៥ឆ្នាំម្ដងនេះ។

អ្នកជំនាញរូបនេះបាននិយាយថា ទីក្រុងព្យុងយ៉ាង ទំនងជាបង្អួតពីសមត្ថភាពនុយក្លេអ៊ែររបស់ខ្លួន និងឱ្យសញ្ញាថា ការរំសាយអាវុធនុយក្លេអ៊ែរ ដូចដែលសហរដ្ឋអាមេរិកចង់បាន គឺមិនអាចទៅរួចនោះទេ៕