ផែនការសន្តិភាព ២០ចំណុច របស់លោកប្រធានាធិបតីអាមេរិក Donald Trump សម្រាប់តំបន់ហ្កាហ្សា គូសប្លង់មេសម្រាប់ភាពជារដ្ឋរបស់ប៉ាឡេស្ទីន ប៉ុន្តែនៅតំបន់កាន់កាប់ West Bank ដែលជាទឹកដីសម្រាប់ក្ដីសង្ឈឹមរដ្ឋប៉ាឡេស្ទីន កំពុងតែមានចក្ខុវិស័យសេដ្ឋកិច្ចយ៉ាងអាប់អួរបំផុត ដែលអាចឈានទៅរកការដួលរលំទាំងស្រុង។

ច្រករបៀងដឹកជញ្ជូន ដែលប្រើដោយអាជីវកម្ម ត្រូវពុះបំបែកដោយតំបន់តាំងលំនៅរបស់អ៊ីស្រាអែល ចំណែកនិយោជិតនៃស្ថាប័នប៉ាឡេស្ទីន មិនអាចទទួលបានប្រាក់ឈ្នួលបានទេ ដោយសារអ៊ីស្រាអែល រារាំងការផ្ទេរចំណូលពន្ធ ហើយសសរស្តម្ភសំខាន់នៃការផ្ញើប្រាក់ពីកម្មករប៉ាឡេស្ទីន ដែលធ្វើការនៅអ៊ីស្រាអែល ក៏បានរីងស្ងួតអស់ តាំងតែពីសង្រ្គាមនៅតំបន់ហ្កាហ្សា បានចាប់ផ្តើមមក។

លោក Trump មានការគាំទ្រពីលោកនាយករដ្ឋមន្ត្រីអ៊ីស្រាអែល Benjamin Netanyahu ចំពោះសំណើសន្តិភាពដែលគាំទ្រដោយអាមេរិក ដើម្បីបញ្ចប់សង្រ្គាមជិត ២ឆ្នាំនៅហ្កាហ្សា ហើយក៏ការគាំទ្រអន្តរជាតិក៏កើនឡើងកាន់តែខ្លាំងសម្រាប់រដ្ឋប៉ាឡេស្ទីន។ ប៉ុន្តែសន្តិភាពហ្កាហ្សាពិតប្រាកដ មិនត្រូវបានធានានោះឡើយ ខណៈមានសំណួរជាច្រើនថា តើក្រុមហាម៉ាស នឹងទទួលយកផែនការនេះឬអត់។

នៅពេលដែលទឹកដីហ្កាហ្សា កំពុងត្រូវបំផ្លាញ សេដ្ឋកិច្ចរបស់ West Bank ក៏កំពុងតែដួលរលំដូចគ្នា។ ចាប់តាំងពីខែឧសភាមក ក្រសួងហិរញ្ញវត្ថុរបស់អ៊ីស្រាអែល បានរក្សាទុកប្រហែល ១០ពាន់លានស្ហាកែល (២,៩៦ ពាន់លានដុល្លារ) នៃមូលនិធិដែនដីប៉ាឡេស្ទីន ដែលខ្លួនប្រមូល ក្រោមរូបភាពជាពន្ធអាករ និងពន្ធកាតព្វកិច្ចជំនួសឱ្យអាជ្ញាធរប៉ាឡេស្ទីន PA ដែលឥឡូវនេះ ប្រាក់ខែបុគ្គលិកត្រូវកាត់បន្ថយ និងមិនអាចបង់ប្រាក់ឈ្នួលឱ្យអ្នកម៉ៅការបាន។

ចាប់តាំងពីខែតុលា ឆ្នាំ២០២៣មក ការទូទាត់ប្រាក់បៀវត្សរ៍របស់អាជ្ញាធរប៉ាឡេស្ទីន ត្រូវកាត់បន្ថយមកត្រឹមប្រហែល ៧០% នៃប្រាក់ឈ្នួលពេញ ហើយបានធ្លាក់បន្ថែមទៀតនៅពាក់កណ្តាលឆ្នាំ២០២៥ បន្ទាប់ពីការផ្អាកផ្ទេរប្រាក់ចំណូលពីអ៊ីស្រាអែល៕