កាសែត Jerusalem Post បានរាយការណ៍ថា កងកម្លាំងការពារអ៊ីស្រាអែល (IDF) បានបំផ្លាញអគារប្រហែល ១.២៥០ នៅតំបន់ហ្កាហ្សា ចាប់តាំងពីប្រតិបត្តិការ ដើម្បីកាន់កាប់ទីក្រុងដ៏ធំបំផុត ក្នុងដែនដី ប៉ាឡេស្ទីន ត្រូវបានចាប់ផ្តើម នៅក្នុងខែសីហា ខណៈពេលដែលវាមិនបានកម្ចាត់ជនសកម្មប្រយុទ្ធ ២០០ នាក់ក៏ដោយ។

សារព័ត៌មាននេះ បាននិយាយថា យ៉ាងហោចណាស់មួយភាគបីនៃអគារដែលត្រូវបានបំផ្លាញទាំងអស់ត្រូវបានចាត់ថ្នាក់ថា មានមូលដ្ឋានយោធាទាំងស្រុង ហើយប្រហែលពាក់កណ្តាល ត្រូវបានចាត់ថ្នាក់ថា ជាកន្លែងបន្ទាប់បន្សំដែលត្រូវបានដោយក្រុមសកម្មប្រយុទ្ធ ដូចជាមានកាមេរ៉ាឃ្លាំមើលជាដើម។ ប្រភព IDF បានប្រាប់ The Jerusalem Post ថា ប្រសិនបើរចនាសម្ព័ន្ធមួយពាក់ព័ន្ធនឹងកាមេរ៉ាឃ្លាំមើលយ៉ាងតិចមួយ អគារជាច្រើនជាន់ទាំងមូល អាចនឹងត្រូវកម្ទេចចោល។ ភាពពិតប្រាកនៃអគារមួយចំនួន នៅតែមិនច្បាស់លាស់។

កាលពីថ្ងៃទី ០៨ ខែសីហា គណៈរដ្ឋមន្ត្រីនយោបាយ-យោធាអ៊ីស្រាអែល បានអនុម័តផែនការដែលស្នើឡើងដោយនាយករដ្ឋមន្ត្រីអ៊ីស្រាអែលលោក Benjamin Netanyahu ដើមដណ្តោមគ្រប់គ្រងទីក្រុងហ្កាហ្សា និងពង្រីកប្រតិបត្តិការនៅក្នុងទឹកដីប៉ាឡេស្ទីន។ នៅថ្ងៃទី ២០ ខែសីហា កងកម្លាំង IDF បានបើកការវាយលុកនៅជាយក្រុងនេះ។

កាលពីថ្ងៃទី ១៦ ខែកញ្ញា លោក Netanyahu បានបញ្ជាក់ពីការចាប់ផ្តើមប្រតិបត្តិការវាយលុកដ៏ខ្លាំងក្លាមួយដោយយោធាអ៊ីស្រាអែលនៅតំបន់ហ្កាហ្សា ជាមួយនឹងគោលដៅនៃប្រតិបត្តិការ គឺដើម្បីកម្ទេចចលនាប៉ាឡេស្ទីនហាម៉ាស់។ យោងតាម IDF កងទ័ពអ៊ីស្រាអែលគ្រប់គ្រងប្រហែល ៨០% នៃទីក្រុងនេះ៕