ប្រតិបត្តិការជួយសង្រ្គោះ ត្រូវបានធ្វើឡើងដោយកងកម្លាំងសហភាពអឺរ៉ុប(EU) លើនាវាដោតទង់ជាតិហូឡង់ នៅក្នុងឈូងសមុទ្រអាដែន ដែលបេសកកម្មសមុទ្រនេះ ត្រូវបានធ្វើឡើងជាការឆ្លើយតបនឹងការវាយប្រហាររបស់ក្រុមឧទ្ទាមហូធីលើផ្លូវដឹកជញ្ជូនអន្តរជាតិ ស្ថិតក្នុងសមុទ្រក្រហម ។

នៅថ្ងៃពុធនេះ ក្រុមឧទ្ទាមហ៊ូធីយេម៉ែន បានប្រកាសទទួលស្គាល់សម្រាប់ការវាយប្រហារលើនាវាដឹកទំនិញដោតទង់ជាតិហូឡង់ Minervagracht ដែលបានឆាបឆេះជាអគ្គិភ័យនៅឈូងសមុទ្រអាដែន ។

កាលពីថ្ងៃអង្គារ ក្រុមហ៊ូធីគាំទ្រដោយអ៊ីរ៉ង់ បានគំរាមកំហែងកំណត់គោលដៅលើក្រុមហ៊ុនប្រេងធំៗរបស់សហរដ្ឋអាមេរិក រួមមានទាំងក្រុមហ៊ុន Exxon Mobil និងក្រុមហ៊ុន Chevron ទោះបីជាមានបទឈប់បាញ់ជាមួយទីក្រុងវ៉ាស៊ីនតោន មិនឲ្យវាយប្រហារលើនាវាជាប់ពាក់ព័ន្ធជាមួយសហរដ្ឋអាមេរិកនៅក្នុងសមុទ្រក្រហម និងឈូងសមុទ្រអាដែនក៏ដោយ ។ 

មជ្ឈមណ្ឌលសម្របសម្រួលប្រតិបត្តិការមនុស្សធម៌របស់ក្រុមហ៊ូធី ដែលមានទំនាក់ទំនងជាមួយប្រតិបត្តិករដឹកជញ្ជូនតាមនាវា បានប្រកាសដាក់ទណ្ឌកម្មលើក្រុមហ៊ុនអាមេរិកចំនួន ១៣ក្រុមហ៊ុន លើនាយកប្រតិបត្តិចំនួន ៩រូប និងនាវាចំនួន ២គ្រឿង ដោយប្រកាសថាពួកគេគឺជាអង្គភាពអរិភាព ។

សូមបញ្ជាក់ថា ក្រុមហ៊ូធី បានបើកការវាយប្រហារជាច្រើនលើកលើនាវាឆ្លងកាត់សមុទ្រក្រហមចាប់តាំងពីឆ្នាំ ២០២៣រហូតមក ដោយមានគោលដៅនាវាដែលពួកគេយល់ឃើញថាមានទំនាក់ទំនងជាមួយអ៊ីស្រាអែល ជាការបង្ហាញសាមគ្គីភាពជាមួយជនប៉ាឡេស្ទីន ជុំវិញសង្រ្គាមនៅហ្កាហ្សា ៕