អាជ្ញាធរអ៊ីរ៉ង់ នៅថ្ងៃពុធ (ទី១ ខែតុលា) នេះ បានអនុម័តសេចក្ដីច្បាប់រឹតបន្តឹងការពិន័យ ចំពោះអ្នកដែលត្រូវបានកាត់ទោសពីបទធ្វើចារកម្មឲ្យអ៊ីស្រាអែល និងសហរដ្ឋអាមេរិក ដោយវិធានការនេះ កើតមានឡើងប៉ុន្មានខែបន្ទាប់ពីមានសង្គ្រាមរយៈពេល ១២ថ្ងៃ រវាងប្រទេសគូអរិទាំង ៣ នេះ។

សេចក្តីព្រាងច្បាប់នេះត្រូវបានដាក់ជូនទៅរដ្ឋសភា កាលពីថ្ងៃទី២៣ ខែមិថុនា ខណៈដែលអ៊ីរ៉ង់ និងអ៊ីស្រាអែល បានប្រយុទ្ធគ្នានៅក្នុងសង្រ្គាម ដែលបានឃើញការវាយប្រហាររបស់អ៊ីស្រាអែលមិនធ្លាប់មានពីមុនលើសាធារណរដ្ឋឥស្លាមដែលសហរដ្ឋអាមេរិកបានចូលរួមមួយភ្លែតដែរ។

ប្រធានាធិបតីអ៊ីរ៉ង់ត្រូវតែចុះហត្ថលេខាលើច្បាប់នេះ មុនពេលវាចូលជាធរមាន។ ការអនុម័តនេះកើតឡើងបន្ទាប់ពីមនុស្សរាប់សិបនាក់ត្រូវបានចាប់ខ្លួនដោយអាជ្ញាធរពីបទសង្ស័យថា បានធ្វើចារកម្មឲ្យអ៊ីស្រាអែល និងសហរដ្ឋអាមេរិក ក្រោយបញ្ចប់សង្គ្រាម។

ក្រុមប្រឹក្សារបស់ស្ថាប័នអាណាព្យាបាល ដែលជាស្ថាប័នទទួលបន្ទុកត្រួតពិនិត្យច្បាប់ បានឲ្យដឹងថា សេចក្ដីស្នើច្បាប់ដែលយល់ព្រមឲ្យមាន «ការដាក់ទណ្ឌកម្មកាន់តែតឹងរ៉ឹង ចំពោះការធ្វើចារកម្ម និងកិច្ចសហប្រតិបត្តិការជាមួយរបបគាំទ្រលទ្ធិហ្សាអឺន (អ៊ីស្រាអែល) និងប្រទេសអរិភាព ក្នុងនោះរួមទាំងសហរដ្ឋអាមេរិកផងដែរ ពាក់ព័ន្ធសន្តិសុខ និងផលប្រយោជន៍ជាតិ» ត្រូវបានអនុម័ត។

តែយ៉ាងណាក្ដី យោងតាមទីភ្នាក់ងារសារព័ត៌មានរដ្ឋ IRNA បានឲ្យដឹងថា មិនមានការបញ្ជាក់ច្បាស់លាស់ថា តើប្រទេសណាផ្សេងទៀត ត្រូវបានចាត់ទុកថា ជា «សត្រូវ» នោះឡើយ ប៉ុន្តែបានប្រាប់ថា «ជំនួយដោយចេតនាទាំងអស់ ត្រូវបានថ្កោលទោសថា ជាការប្រព្រឹត្តិអំពើពុករលួយនៅលើភពផែនដី» ជាការចោទប្រកាន់ដ៏ធ្ងន់ធ្ងរបំផុតមួយ នៅក្នុងប្រទេសអ៊ីរ៉ង់ ដែលត្រូវផ្តន្ទាទោសប្រហារជីវិត៕