លោកប្រធានាធិបតី Tayyip Erdogan បាននិយាយនៅថ្ងៃពុធ (ទី១ ខែតុលា) នេះថា ប្រទេសទួរគីនឹងមិនអនុញ្ញាតឲ្យមានការបំបាក់បំបែក ឬបង្កគ្រោះថ្នាក់ដល់បូរណភាពដែនដីរបស់ខ្លួនឡើយ ប្រសិនបើការទូត ដើម្បីអនុវត្តកិច្ចព្រមព្រៀងសមាហរណកម្ម រវាងកងកម្លាំងប្រជាធិបតេយ្យស៊ីរី (SDF) ដឹកនាំដោយកងជីវពលឃឺដ និងរដ្ឋាភិបាលស៊ីរី បរាជ័យ។

នៅឯព្រឹត្តិការណ៍ ដើម្បីប្រារព្ធពិធីមុនបើកសភាឡើងវិញ លោក Erdogan បានបញ្ជាក់ថា៖ «យើងបានភ្ជាប់បណ្តាញការទូតទាំងអស់ ទាំងដើម្បីការពារបូរណភាពទឹកដីរបស់ប្រទេសស៊ីរី និងរារាំងរចនាសម្ព័ន្ធភេរវករកុំឲ្យកើតឡើងនៅទូទាំងព្រំដែនរបស់យើង។ យើងបន្តប្រើប្រាស់បណ្តាញទាំងនេះ ដោយភាពអត់ធ្មត់ ស្មោះត្រង់ និងសុភនិច្ឆ័យ»។

លោកបានបន្ថែមថា៖ «ប្រសិនបើគំនិតផ្តួចផ្តើមការទូត មិនទទួលបានជោគជ័យទេនោះ គោលនយោបាយ និងជំហររបស់ប្រទេសទួរគី មានភាពច្បាស់លាស់ណាស់។ ទួរគីនឹងមិនអនុញ្ញាតឲ្យហេតុការណ៍កាលពីមុនកើតមានឡើងនៅក្នុងប្រទេសស៊ីរីទេ»។

គួរបញ្ជាក់ថា ទីក្រុងអង់ការ៉ាចាត់ទុកក្រុម SDF ជាអង្គការភេរវករ ហើយបានព្រមានអំពីការមានវិធានការយោធា ប្រសិនបើក្រុមនេះមិនធ្វើសមាហរណកម្មទៅក្នុងប្រព័ន្ធរដ្ឋរបស់ប្រទេសស៊ីរី តាមកិច្ចព្រមព្រៀងដែលខ្លួនយល់ជាមួយទីក្រុងដាម៉ាសទេនោះ៕