កិច្ចប្រជុំក្រុមការងាររួមស្តីពី “កិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី លើកទី១ នៅ ម៉ាឡេស៊ី បានបញ្ចប់ដោយផ្លែផ្កា ដោយនឹងបន្ត កិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី លើកទី២ នៅកម្ពុជា ក្នុងឆ្នាំ២០២៦។

ដោយទទួលបានគោលការណ៍អនុញ្ញាតពី ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តមបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានដឹកនាំក្រុមការងារបច្ចេកទេសក្រសួងទេសចរណ៍ ចូលរួមកិច្ចប្រជុំក្រុមការងាររួមស្តីពី “កិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី លើកទី១ (The First Joint Working Group on Tourism Cooperation between Cambodia and Malaysia)” កាលពី ថ្ងៃទី២៨ ខែកញ្ញា ឆ្នាំ២០២៥ នៅទីក្រុងម៉ាឡាកា ប្រទេសម៉ាឡេស៊ី ដែលបានរៀបចំឡើងអមជាមួយការប្រារព្វទិវាទេសចរណ៍ពិភពលោកឆ្នាំ២០២៥ សន្និសីទទេសចរណ៍ពិភពលោកលើកទី៧ និងកិច្ចប្រជុំចង្អៀតរដ្ឋមន្ត្រីទេសចរណ៍អាស៊ាន។

កិច្ចប្រជុំនេះរៀបចំឡើងក្រោមស្មារតី នៃការអនុវត្តអនុស្សរណៈយោគយល់គ្នា (MoU) ស្តីពី កិច្ចសហប្រតិបត្តិការលើវិស័យទេសចរណ៍រវាងកម្ពុជា និងម៉ាឡេស៊ី ដែលបានចុះហត្ថលេខា កាលពីថ្ងៃទី៣ ខែកញ្ញា ឆ្នាំ២០១៩។

ជាលទ្ធផល ភាគីទាំងពីរបានឯកភាពលើលក្ខខណ្ឌ នៃការអនុវត្តការងាររបស់ក្រុមការងាររួម ស្តីពី កិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី (Term of Reference for Joint Working Group on Tourism Cooperation Between Cambodia and Malaysia) និងឯកភាពឱ្យក្រុមការងារបច្ចេកទេស នៃប្រទេសទាំងពីរ បន្តពិភាក្សាលើផែនទីបង្ហាញផ្លូវ (Roadmap) នៃសកម្មភាពទេសចរណ៍រួម ដែលនឹងត្រូវអនុវត្តនៅក្នុងកិច្ចប្រជុំក្រុមការងាររួម ស្តីពី កិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី លើកទី២ នៅកម្ពុជា ក្នុងឆ្នាំ២០២៦ ខាងមុខ។