ក្រុមតាមដានផ្ទាំងទឹកកក GLAMOS បាននិយាយនៅថ្ងៃពុធនេះថា ផ្ទាំងទឹកនៅប្រទេសស្វីស បានរលាយយ៉ាងឆាប់រហ័សក្នុងរយៈពេល ១២ខែកន្លងមកនេះ ដែលជាការរលាយច្រើនបំផុតលើកទី ៤ ក្នុងទំហំទឹកកកជាប់កំណត់ត្រា ។

យោងតាមរបាយការណ៍ឆ្នាំនេះរបស់ GLAMOS និងគណៈកម្មការអង្កេតមណ្ឌលកំណកស្វីស បានឲ្យដឹងថា រដូវរងាមានព្រិលធ្លាក់តិច ជាពិសេសនៅតំបន់ភាគឦសាននៃភ្នំអាល់របស់ស្វីស គួបផ្សំនិងរលកកម្តៅកាលពីខែមិថុនា ក្នុងឆ្នាំនេះ បណ្តាលឲ្យផ្ទាំងទឹកកកបាត់បង់ម៉ាសសរុបរបស់វាចំនួន ៣ភាគរយ ។

លោក Matthias Huss គឺជាប្រធាន GLAMOS និយាយថា នេះពិតជាមានការបាត់បង់ផ្ទាំងទឹកកកច្រើនខ្លាំងណាស់ ។

លោកថា បើទោះបីជាការរលាយទឹកកកនេះមិនធ្ងន់ធ្ងរដូចកាលពីឆ្នាំ ២០២២ និងឆ្នាំ ២០២៣ ពេលដែលផ្ទាំងទឹកកកបាត់បង់ទំហំរបស់វាចំនួន ៥,៩ភាគរយ និង ៤,៤ភាគរយក្តី និន្នាការបានមើលឃើញយ៉ាងច្បាស់ក្រឡែត ។

លោក Huss បញ្ជាក់ថា ប្រទេសស្វីសមាននូវកំណត់ត្រារលាយទឹកកកដ៏អាក្រក់បំផុតរបស់ខ្លួនក្នុងទសវត្សរ៍នេះ ក្នុងនោះ ១ភាគ ៤នៃទំហំផ្ទាំងទឹកកក បានបាត់បង់ ចាប់តាំងពីឆ្នាំ ២០១៥រហូតមក ។

ផ្ទាំងទឹកកក Rhone គឺជាផ្ទាំងទឹកកកធំជាងគេបំផុតនៅអឺរ៉ុប អំឡុងយុគសម័យទឹកកក ប៉ុន្តែវារួមតូចយ៉ាងឆាប់រហ័ស ដោយបាត់បង់កម្រាស់ទឹកកកជាមធ្យមប្រហែល ១,៥ម៉ែត្រ ក្នុងឆ្នាំនេះ ។

យោងតាមការអះអាងរបស់ GLAMOS បានឲ្យដឹងថា ផ្ទាំងទឹកកកចំនួន ១០០ផ្ទាំងនៅស្វីស បានបាត់ខ្លួនចន្លោះឆ្នាំ ២០១៦ និងឆ្នាំ ២០២២ ហើយពួកគេនិយាយថា ភាគច្រើននៃផ្ទាំងទឹកកក អាចនឹងបាត់ខ្លួននៅដំណាច់សតវត្សរ៍នេះ ៕