អាជ្ញាធរក្នុងតំបន់បាននិយាយថា មនុស្សយ៉ាងតិច ២នាក់ បានស្លាប់ និងមួយចំនួនផ្សេងទៀតបានរងរបួសក្នុងទីក្រុង Lqliaa នៅក្បែរទីក្រុង Agadir ប្រទេសម៉ារ៉ុក នៅពេលដែលកងកម្លាំងសន្តិសុខបានបាញ់ព្រមានដើម្បីរារាំងបុគ្គលមួយក្រុមមិនឱ្យលួចអាវុធរបស់មន្រ្តីកាលពីយប់ថ្ងៃពុធ (១ តុលា) នៅក្នុងឧប្បត្តិហេតុមួយដែលបង្ហាញពីការផ្លាស់ប្តូរទៅជាហិង្សានៅក្នុងការតវ៉ាប្រឆាំងរដ្ឋាភិបាល ដែលដំបូងឡើយមានគោលបំណងទាមទារកំណែទម្រង់យុត្តិធម៌សង្គម។

ក្រសួងមហាផ្ទៃរបស់ប្រទេសនេះនិយាយថា អាជ្ញាធរម៉ារ៉ុក បានចាប់ខ្លួនមនុស្សជាង ៤០០នាក់ ក្នុងអំឡុងពេលការតវ៉ាដ៏ហិង្សានោះ ដែលក៏ទាមទារឱ្យមានកំណែទម្រង់ក្នុងវិស័យសុខភាពសាធារណៈ និងការអប់រំ។ ការតវ៉ារបស់យុវជនកាលពីថ្ងៃពុធគឺជាយប់ទី៥ ហើយ និងបានរីករាលដាលក្នុងទីក្រុងនានាទូទាំងប្រទេសអាហ្វ្រិកខាងជើងមួយនេះ។

ការតវ៉ាបានចាប់ផ្តើមដំបូងកាលពីថ្ងៃសៅរ៍ចុងសប្ដាហ៍មុន ជាមួយនឹងការទាមទារឱ្យមានការអប់រំ និងការថែទាំសុខភាពកាន់តែប្រសើរឡើង ហើយត្រូវរៀបចំឡើងតាមបណ្ដាញអ៊ីនធឺណិតដោយយុវជនអនាមិកមួយក្រុម ដែលហៅខ្លួនឯងថាក្រុម "GenZ 212"។ ក្រុមនេះប្រើប្រាស់វេទិកាដូចជា TikTok, Instagram និងកម្មវិធីហ្គេម Discord ដើម្បីប្រមូលការគាំទ្រ។

អាជ្ញាធរមូលដ្ឋាននិយាយថា កងកម្លាំងសន្តិសុខចាំបាច់ត្រូវប្រើអាវុធដើម្បីការពារខ្លួន បន្ទាប់ពីឧស្ម័នបង្ហូរទឹកភ្នែកមិនអាចបញ្ឈប់ក្រុមយុវជនទាំងនេះពីការសម្រុកចូលទៅក្នុងទីតាំងរបស់កងកម្លាំងសន្តិសុខ។ យោងតាមសាក្សីបានឱ្យដឹងថា កាលពីយប់ថ្ងៃពុធ អំពើហិង្សាបានរីករាលដាលដល់ទីក្រុង Salé នៅជិតរដ្ឋធានីរ៉ាបា ជាទីដែលក្រុមយុវជនបានចូលទៅក្នុងសង្កាត់មានប្រជាជនរស់នៅច្រើន ហើយបានគប់ដុំថ្មដាក់លើនគរបាល ប្លន់ហាងទំនិញ ដុតធនាគារ និងដុតរថយន្តនគរបាលយ៉ាងកម្រោល៕