រដ្ឋមន្ត្រីការពារជាតិអ៊ីស្រាអែលបានចេញការព្រមានចុងក្រោយសម្រាប់អ្នករស់នៅក្នុងទីក្រុង ហ្កាហ្សាឱ្យភៀសខ្លួនទៅភាគខាងត្បូងកាលពីថ្ងៃពុធ ១ តុលា ខណៈក្រុមហាម៉ាស បានថ្លឹងថ្លែងលើផែនការរបស់លោកប្រធានាធិបតីអាមេរិក Donald Trump ដើម្បីបញ្ចប់សង្រ្គាមជិតពីរឆ្នាំនៅក្នុងទឹកដីប៉ាឡេស្ទីនរងការបំផ្លិចបំផ្លាញមួយនេះ។

ក្រុមអ្នកឃើញហេតុការណ៍ បានរាយការណ៍ពីការទម្លាក់គ្រាប់បែកយ៉ាងខ្លាំងក្លានៅកណ្តាលទីក្រុងដែលមានមនុស្សរស់នៅដ៏ច្រើនបំផុតរបស់ដែនដីហ្កាហ្សា ខណៈរដ្ឋមន្ត្រីការពារជាតិអ៊ីស្រាអែល លោក Israel Katz បានព្រមានថា យោធាកំពុងរឹតបន្តឹងការឡោមព័ទ្ធទីក្រុងនេះ។

លោក Katz បានបង្ហោះនៅលើបណ្ដាញសង្គម Xថា នេះគឺជាឱកាសសម្រាប់ពលរដ្ឋហ្កាហ្សា ដែលចង់ទៅកាន់ភាគខាងត្បូង និងបោះបង់ចោលក្រុមហាម៉ាសឲ្យឯកានៅក្នុងទីក្រុងហ្កាហ្សា ដោយបន្ថែមថាអ្នកដែលនៅសេសសល់នឹងត្រូវបានចាត់ទុកជាភេរវករ និងអ្នកគាំទ្រក្រុមភេរវករ។

រដ្ឋមន្ត្រីការពារជាតិអ៊ីស្រាអែលរូបនេះ បាននិយាយថា យោធាដណ្ដើមបានហើយនូវច្រករបៀង Netzarim នៅភាគកណ្តាល ហ្កាហ្សាស្ទ្រីប ឆ្លងកាត់ទៅឆ្នេរសមុទ្រភាគខាងលិច ជាសកម្មភាព មួយដែលលោកបាននិយាយថា កាត់ផ្ដាច់ផ្លូវភាគខាងជើងដែនដីហ្កាហ្សា ចេញពីភាគខាងត្បូង។  

លោកបានបន្ថែមថា នរណាក៏ដោយដែលចាកចេញពីទីក្រុង ហ្កាហ្សា ទៅភាគខាងត្បូង នឹងត្រូវឆ្លងកាត់ប៉ុស្តិ៍ត្រួតពិនិត្យយោធាអ៊ីស្រាអែល។

សេចក្តីប្រកាសនេះបានធ្វើឡើងប៉ុន្មានម៉ោងបន្ទាប់ពីយោធាបាននិយាយថា ខ្លួនកំពុងបិទផ្លូវដែលនៅសល់ចុងក្រោយសម្រាប់អ្នករស់នៅភាគខាងត្បូងហ្កាហ្សាដើម្បីចូលទៅកាន់ភាគខាងជើង៕