ប្រភពពីសារព័ត៌មានរ៉យទ័រ និងកាសែត Wall Street Journal (WSJ) បានរាយការណ៍កាលពីថ្ងៃពុធ (១ តុលា) ថា សហរដ្ឋអាមេរិក នឹងផ្តល់ព័ត៌មានចារកម្មសម្ងាត់ឱ្យដល់អ៊ុយក្រែន សម្រាប់ការវាយប្រហារមីស៊ីលរយៈចម្ងាយឆ្ងាយលើហេដ្ឋារចនាសម្ព័ន្ធថាមពលរុស្ស៊ី ខណៈទីក្រុងវ៉ាស៊ីនតោន កំពុងថ្លឹងថ្លែងថាតើត្រូវបញ្ជូនអាវុធឱ្យទីក្រុងគីវ ដែលអាចដាក់គោលដៅកាន់តែជ្រៅចូលក្នុងទឹកដីរុស្ស៊ី ឬយ៉ាងណា។

សហរដ្ឋអាមេរិក បានចែករំលែកព័ត៌មានសម្ងាត់ជាមួយទីក្រុងគីវ ជាយូរមកហើយ ប៉ុន្តែរបាយការណ៍កាលពីថ្ងៃពុធនេះនិយាយថា ចារកម្មសម្ងាត់ថ្មីនឹងធ្វើឱ្យអ៊ុយក្រែន កាន់តែងាយស្រួលក្នុងការវាយលុករោងចក្រចម្រាញ់ បំពង់បង្ហូរប្រេង ស្ថានីយ៍ថាមពល និងហេដ្ឋារចនាសម្ព័ន្ធផ្សេងៗទៀត ជាមួយនឹងគោលបំណងរាំងខ្ទប់ប្រាក់ចំណូលប្រេងរបស់វិមានក្រឹមឡាំង។

សេចក្ដីរាយការណ៍និយាយទៀតថា មន្ត្រីអាមេរិកក៏ស្នើឱ្យសម្ព័ន្ធមិត្តណាតូ ផ្តល់ការគាំទ្រស្រដៀងគ្នានេះដែរ។ ប្រធានាធិបតីអាមេរិក លោក Donald Trump បាននឹងកំពុងដាក់សម្ពាធលើបណ្តាប្រទេសនៅអឺរ៉ុប ឱ្យឈប់ទិញប្រេងពីរុស្ស៊ី ជាថ្នូរនឹងកិច្ចព្រមព្រៀងរបស់លោក ក្នុងការដាក់ទណ្ឌកម្មដ៏តឹងរ៉ឹងលើទីក្រុងមូស្គូ ដើម្បីព្យាយាមធ្វើឱ្យរីងស្ងួតថវិកាដែលទ្រទ្រង់សង្រ្គាមរុស្ស៊ី លើអ៊ុយក្រែន។

យោងតាមមន្ត្រីអាមេរិក ដែលត្រូវស្រង់សម្ដីដោយកាសែត WSJ បានឱ្យដឹងថា ការយល់ព្រមចែករំលែកដំណឹងចារកម្មបន្ថែមនេះ បានកើតឡើងភ្លាមៗមុនពេលលោក Trump បង្ហោះលើប្រព័ន្ធផ្សព្វផ្សាយសង្គមកាលពីសប្តាហ៍មុន ដែលនិយាយថា អ៊ុយក្រែនអាចដណ្តើមយកទឹកដីទាំងអស់របស់ខ្លួនមកវិញ ដែលកាន់កាប់ដោយរុស្ស៊ី។

ទាក់ទងនឹងជំនួយយោធា អាមេរិក កំពុងពិចារណាសំណើរបស់អ៊ុយក្រែន ដើម្បីទទួលបានមីស៊ីលតម្រង់គោលដៅ Tomahawk ដែលមានចម្ងាយ ២.៥០០គីឡូម៉ែត្រ - ឆ្ងាយគ្រប់គ្រាន់ដើម្បីវាយលើទីក្រុងមូស្គូ និងផ្នែកភាគច្រើននៃទឹកដីរុស្ស៊ីនៅអឺរ៉ុប- ប្រសិនបើត្រូវបាញ់ចេញពីអ៊ុយក្រែន៕