មេដឹកនាំសហភាពអឺរ៉ុប កាលពីថ្ងៃពុធ (១ តុលា) បានរួមគ្នាគាំទ្រផែនការ "ជញ្ជាំងដ្រូន" ដើម្បីពង្រឹងវិស័យការពាររបស់ប្លុកនេះ ប្រឆាំងនឹងយានដ្រូនរបស់រុស្ស៊ី ខណៈថ្នាក់ដឹកនាំអឺរ៉ុបបានជួបប្រជុំគ្នានៅទីក្រុង កូប៉ិនហាក (Copenhagen) ប៉ុន្មានថ្ងៃប៉ុណ្ណោះបន្ទាប់ពីការបំពានដែនអាកាសដោយយន្តហោះដ្រូន បានបង្កការភ្ញាក់ផ្អើលខ្លាំងនៅប្រទេសដាណឺម៉ាក។

អាជ្ញាធរអ៊ឺរ៉ុប បានចោទរុស្ស៊ី ថានៅពីក្រោយការបំពានដែនអាកាសក្នុងតំបន់នេះ រួមទាំងការជ្រៀតចូលថ្មីៗដោយដ្រូនរបស់ទីក្រុងមូស្គូលើដែនអាកាសប៉ូឡូញ និងយន្តហោះចម្បាំងលើទឹកដីអេស្តូនី។ នាយករដ្ឋមន្ត្រីដាណឺម៉ាក លោកស្រី Mette Frederiksen បាននិយាយបន្ទាប់ពីកិច្ចប្រជុំកំពូលរបស់សហភាពអឺរ៉ុបនេះថា "អឺរ៉ុបត្រូវតែមានសមត្ថភាពអាចការពារខ្លួនបាន"។

ដាណឺម៉ាក មិននិយាយច្បាស់ៗទេថាអ្នកណាដែលខ្លួនជឿថានៅពីក្រោយឧប្បត្តិហេតុបំពានដែនអាកាសកាលពីសប្តាហ៍មុននោះ ដែលបានរំខានដល់ចរាចរណ៍ផ្លូវអាកាសនៅអាកាសយានដ្ឋានជាច្រើន ប៉ុន្តែលោកស្រី Frederiksen បានបង្ហើបថាអាចជាទីក្រុងមូស្គូ។

អគ្គលេខាធិការអង្គការណាតូ លោក Mark Rutte នៅសប្តាហ៍នេះ បានសរសើរគំនិតជញ្ជាំងដ្រូនថា "ទាន់ពេលវេលា និងចាំបាច់" ហើយមេដឹកនាំសហភាពអឺរ៉ុបវិញក៏បានសម្តែងការគាំទ្រខ្លាំងផងដែរនៅជំនួបទីក្រុង កូប៉ិនហាក កាលពីថ្ងៃពុធ។ យ៉ាងណាមិញ គណៈកម្មការដែលជាស្ថាប័នប្រតិបត្តិរបស់ប្លុកអឺរ៉ុប មិនទាន់ផលិតផែនការលម្អិតសម្រាប់ជញ្ជាំងដ្រូននេះនៅឡើយទេ ដោយបន្សល់ទុកនូវសំណួរបើកចំហជាច្រើនអំពីតម្លៃ និងការអនុវត្តជាក់ស្តែង៕