សេតវិមានបាននិយាយថា សហរដ្ឋអាមេរិកនឹងចាត់ទុក «ការវាយប្រហារប្រដាប់អាវុធណាមួយ» ទៅលើទឹកដីប្រទេសកាតា ថាជាការគំរាមកំហែងដល់ទីក្រុងវ៉ាស៊ីនតោន ហើយនឹងផ្តល់ការធានាសន្តិសុខដល់រដ្ឋឈូងសមុទ្រអារ៉ាប់មួយនេះ បន្ទាប់ពីការវាយប្រហាររបស់អ៊ីស្រាអែលលើប្រទេសនេះកាលពីខែមុន។

ក្រឹត្យដែលត្រូវបានចុះហត្ថលេខាដោយប្រធានាធិបតីសហរដ្ឋអាមេរិក លោក Donald Trump កាលពីថ្ងៃចន្ទ (២៩ កញ្ញា) បាននិយាយថា «ចំពោះការបន្តការគំរាមកំហែងដល់រដ្ឋកាតា បង្កឡើងដោយការឈ្លានពានពីបរទេស វាគឺជាគោលនយោបាយរបស់សហរដ្ឋអាមេរិកក្នុងការធានាសន្តិសុខ និងបូរណភាពទឹកដីនៃរដ្ឋកាតាប្រឆាំងការវាយប្រហារពីខាងក្រៅ»។

នៅក្នុងករណីនៃការវាយប្រហារលើប្រទេសកាតា សហរដ្ឋអាមេរិកនឹងចាត់វិធានការស្របច្បាប់ និងសមស្របទាំងអស់ រួមទាំងផ្នែកការទូត សេដ្ឋកិច្ច និងយោធា ប្រសើបើចាំបាច់ដើម្បីការពារផលប្រយោជន៍របស់សហរដ្ឋអាមេរិក និងរដ្ឋកាតា និងដើម្បីស្តារសន្តិភាព និងស្ថិរភាពឡើងវិញ។ កិច្ចព្រមព្រៀងនេះធ្វើឡើងបន្ទាប់ពីការវាយប្រហាររបស់អ៊ីស្រាអែលទៅលើសម្ព័ន្ធមិត្តក្នុងតំបន់ដ៏សំខាន់របស់សហរដ្ឋអាមេរិកកាលពីថ្ងៃទី៩ ខែកញ្ញា ដោយដាក់គោលដៅលើមន្ត្រីមកពីក្រុមប្រដាប់អាវុធហាម៉ាសប៉ាឡេស្ទីន ដែលកំពុងជួបពិភាក្សាគ្នាអំពីសំណើសន្តិភាពរបស់សហរដ្ឋអាមេរិកសម្រាប់សង្គ្រាមនៅតំបន់ហ្កាហ្សា។

នាយករដ្ឋមន្ត្រីអ៊ីស្រាអែល លោក Benjamin Netanyahu បានទូរស័ព្ទទៅកាន់នាយករដ្ឋមន្ត្រីប្រទេសកាតា ពីសេតវិមានកាលពីថ្ងៃចន្ទសប្តាហ៍នេះ ដោយបានសុំទោសចំពោះការវាយប្រហារ និងបានសន្យាថានឹងមិនធ្វើដូច្នេះទៀតឡើយ។