ប្រធានាធិបតីប្រទេសកូឡុំប៊ី លោក Gustavo Petro បានបញ្ជាឱ្យបណ្តេញគណៈប្រតិភូការទូតទាំងអស់របស់អ៊ីស្រាអែលកាលពីថ្ងៃពុធ ទី១ ខែតុលា បន្ទាប់ពីការឃុំខ្លួនស្ត្រីជនជាតិកូឡុំប៊ីពីរនាក់ដែលចូលរួមក្នុងក្បួននាវាមនុស្សធម៌ធ្វើដំណើរទៅកាន់តំបន់ហ្កាហ្សា។ លោក Petro បានប្រកាសការសម្រេចនេះនៅលើបណ្តាញផ្សព្វផ្សាយសង្គម ដោយចាត់ទុកការឃុំខ្លួននេះថាជា «ឧក្រិដ្ឋកម្មអន្តរជាតិថ្មី» ដ៏មានសក្តានុពលធ្វើឡើងដោយនាយករដ្ឋមន្ត្រីអ៊ីស្រាអែល លោក Benjamin Netanyahu និងបានបញ្ចប់ភ្លាមៗកិច្ចព្រមព្រៀងពាណិជ្ជកម្មសេរីរបស់ប្រទេសកូឡុំប៊ីជាមួយអ៊ីស្រាអែល។

ក្រុមអ្នកតវ៉ាជាច្រើន បានប្រមូលផ្តុំគ្នានៅទីក្រុង Bogota ដោយថ្កោលទោសការឃុំខ្លួននាង Manuela Bedoya និងនាង Luna Barreto ដែលជិះនៅលើនាវាដឹកជំនួយ Global Sumud។ អ្នកតវ៉ា បាននិយាយថា «វាពិតជាអយុត្តិធម៌ណាស់ ទាំងនេះគឺជាជនស៊ីវិលដែលព្យាយាមដឹកជញ្ជូនជំនួយទៅដល់ប្រជាជនដែលត្រូវបានហ៊ុមព័ទ្ធ និងកំពុងអត់ឃ្លាន ហើយពិភពលោកពុំបានធ្វើអ្វីសោះ»។

ក្រុមសកម្មជន ក៏បានធ្វើបាតុកម្មនៅខាងក្រៅទីស្នាក់ការកណ្តាលនៃសមាគមធុរកិច្ចជាតិរបស់ប្រទេសកូឡុំប៊ី (ANDI) ដោយចោទប្រកាន់ថាសមាគមមានទំនាក់ទំនងពាណិជ្ជកម្មជាមួយអ៊ីស្រាអែល ក្នុងពេលមានជម្លោះដែលកំពុងតែបន្ត។ យោងតាមចលនា Global Sumud បានឲ្យដឹងថា សកម្មជនដែលត្រូវបានឃុំខ្លួនកំពុងត្រូវបានផ្ទេរទៅកាន់កំពង់ផែអ៊ីស្រាអែល។ ក្រុមនេះ បានអំពាវនាវឲ្យមានការកៀងគរប្រឆាំងនឹងអ្វីដែលពួកគេពណ៌នាថាជាការជាប់ពាក់ព័ន្ធផ្នែកសេដ្ឋកិច្ចដោយសកម្មភាពរបស់អ៊ីស្រាអែលនៅតំបន់ហ្កាហ្សា។ លោក Petro ដែលជាអ្នករិះគន់ឥតសំចៃនៃយុទ្ធនាការយោធារបស់អ៊ីស្រាអែល បានប្រៀបធៀបគោលនយោបាយរបស់បែបនេះទៅនឹងគោលនយោបាយរបស់ណាស៊ីអាល្លឺម៉ង់ នៅក្នុងសេចក្តីថ្លែងការណ៍ជាសាធារណៈរបស់លោក។