ទីភ្នាក់ងារសារព័ត៌មាន Tasnim ពាក់កណ្តាលផ្លូវការ បានរាយការណ៍ថា អ្នកនាំពាក្យរដ្ឋាភិបាលអ៊ីរ៉ង់ លោកស្រី Fatemeh Mohajerani បាននិយាយកាលពីថ្ងៃពុធថា សហរដ្ឋអាមេរិក បានច្រានចោលសំណើថ្មីរបស់អ៊ីរ៉ង់សុំកិច្ចពិភាក្សាដោយផ្ទាល់ក្នុងអំឡុងពេលសម័យប្រជុំលើកទី ៨០ នៃមហាសន្និបាតអង្គការសហប្រជាជាតិ (UNGA) នៅទីក្រុងញូវយ៉ក។

នៅខាងក្រៅកិច្ចប្រជុំគណៈរដ្ឋមន្ត្រី លោកស្រី Mohajerani បាននិយាយថា ក្រុមអ៊ីរ៉ង់ដែលចូលរួមក្នុងសម័យប្រជុំ UNGA បានស្នើឲ្យជួបជាមួយបេសកជនពិសេសរបស់សហរដ្ឋអាមេរិកប្រចាំតំបន់មជ្ឈិមបូព៌ា លោក Steve Witkoff ដែលត្រូវចូលរួមដោយរដ្ឋមន្ត្រីការបរទេសនៃប្រទេសបារាំង អង់គ្លេស និងអាល្លឺម៉ង់ ដែលហៅថា ប្រទេស E3 រួមជាមួយនឹងតំណាងទីភ្នាក់ងារថាមពលបរមាណូអន្តរជាតិ។ ទោះជាយ៉ាងណាក៏ដោយលោក Witkoff មិនបានចូលរួមកិច្ចប្រជុំរួមណាមួយនោះទេ។

ដោយកត់សម្គាល់ឃើញថា អ៊ីរ៉ង់បានបន្តផ្លាស់ប្តូរសារជាមួយសហរដ្ឋអាមេរិកដោយផ្ទាល់ និងដោយប្រយោល ហើយមានការហត់នឿយចំពោះរាល់កិច្ចខិតខំប្រឹងប្រែង ដើម្បីដោះស្រាយបញ្ហានុយក្លេអ៊ែររបស់អ៊ីរ៉ង់ និងទប់ស្កាត់ការដាក់ទណ្ឌកម្មរបស់អង្គការសហប្រជាជាតិឡើងវិញ លោកស្រី Mohajerani បានចោទប្រកាន់សហរដ្ឋអាមេរិកថា បានធ្វើការទាមទារហួសហេតុ និងមិនបានគោរពតាមការសន្យា។

លោកស្រី បាននិយាយថា អ៊ីរ៉ង់ថែមទាំងបានស្នើសុំពន្យារពេល ៤៥ថ្ងៃ ក្នុងការធ្វើឲ្យយន្តការផ្លូវច្បាប់ដំណើរការឡើងវិញ នៅគ្រាចុងក្រោយ ដែលត្រូវបានច្រានចោលដោយភាគីម្ខាងទៀត ក្រោមសម្ពាធរបស់អ៊ីស្រាអែល ដោយបានបន្ថែមថា ការប្តេជ្ញាចិត្តរបស់ភាគីម្ខាងទៀត ក្នុងការចរចាគឺ «គ្រាន់តែជាការភូតកុហក»៕