បណ្តាប្រទេស G7 កំពុងពិចារណាយ៉ាងយកចិត្តទុកដាក់លើការបង្កើនសម្ពាធលើប្រទេស ដែលកំពុងជំរុញការទិញប្រេងពីរុស្ស៊ី និងជួយក្រុងមូស្គូឲ្យរួចផុតពីទណ្ឌកម្ម។ នេះបើយោងតាមសេចក្តីថ្លែងការណ៍របស់រដ្ឋមន្ត្រីហិរញ្ញវត្ថុ G7។

សេចក្តីថ្លែងការណ៍ បានបញ្ជាក់ថា៖«យើងកំពុងផ្តល់ការពិចារណាយ៉ាងម៉ត់ចត់ចំពោះវិធានការពាណិជ្ជកម្ម និងការរឹតបន្តឹងផ្សេងទៀតលើប្រទេស និងអង្គភាពនានាដែលជួយផ្តល់ហិរញ្ញប្បទានដល់កិច្ចខិតខំប្រឹងប្រែងសង្រ្គាមរបស់រុស្ស៊ី រួមទាំងផលិតផលចម្រាញ់ ដែលមានប្រភពមកពីប្រេងរុស្ស៊ី»។

យោងតាមសេចក្តីថ្លែងការណ៍បានឲ្យដឹងថា៖«យើងបានព្រមព្រៀងគ្នាថា ឥឡូវនេះជាពេលវេលាដើម្បីបង្កើនសម្ពាធលើការនាំចេញប្រេងរបស់រុស្ស៊ី» និង «កំណត់គោលដៅអ្នកដែលកំពុងបន្តបង្កើនការទិញប្រេងរុស្ស៊ី និងអ្នកដែលកំពុងសម្របសម្រួលការគេចវេស»។

រដ្ឋមន្ត្រីក្រសួងហិរញ្ញវត្ថុនៃចក្រភពអង់គ្លេស អាល្លឺម៉ង់ អ៊ីតាលី កាណាដា សហរដ្ឋអាមេរិក បារាំង និង ជប៉ុន បាននិយាយថា៖«យើងបានយល់ព្រមលើសារៈសំខាន់នៃវិធានការពាណិជ្ជកម្ម រួមទាំងពន្ធគយ និងការហាមឃាត់ការនាំចូល-នាំចេញ ក្នុងកិច្ចខិតខំប្រឹងប្រែងរបស់យើងក្នុងការកាត់ផ្តាច់ប្រាក់ចំណូលរបស់ រុស្ស៊ី។ យើងនឹងចាត់វិធានការជាក់ស្តែង ដើម្បីកាត់បន្ថយយ៉ាងខ្លាំង ដោយមានគោលបំណងបញ្ឈប់ការនាំចូលដែលនៅសល់របស់យើងពីប្រទេសរុស្ស៊ី រួមទាំងការនាំចូលអ៊ីដ្រូកាបូន។

ក្រុមប្រទេស G7 បានសន្យាថា នឹងរឹតបន្តឹងទណ្ឌកម្មលើវិស័យសំខាន់ៗនៃសេដ្ឋកិច្ចរុស្ស៊ីដូចជា «ថាមពល ហិរញ្ញវត្ថុ មូលដ្ឋានឧស្សាហកម្មយោធា តំបន់សេដ្ឋកិច្ចពិសេស និងអ្នកផ្តល់លទ្ធភាព និងអ្នករកប្រាក់ចំណេញ»។ នេះបើយោងតាមសេចក្តីថ្លែងការណ៍៕