កាសែត The Wall Street Journal (WSJ) បានរាយការណ៍ដោយដកស្រង់ប្រភពថា សហរដ្ឋអាមេរិក នឹងផ្តល់ឲ្យអ៊ុយក្រែននូវព័ត៌មានសម្ងាត់ ដើម្បីប្រហារដោយមីស៊ីលប្រឆាំងនឹងហេដ្ឋារចនាសម្ព័ន្ធថាមពលរបស់រុស្ស៊ីនេះ។

យោងតាមប្រភពបានឲ្យដឹងថា មន្ត្រីអាមេរិកបានស្នើឲ្យសម្ព័ន្ធមិត្តណាតូ ផ្តល់ការឧបត្ថម្ភគាំទ្រស្រដៀងគ្នានេះ។ សហរដ្ឋអាមេរិក ក៏កំពុងពិចារណាផងដែរអំពីលទ្ធភាពក្នុងការបញ្ជូនមីស៊ីល Tomahawk និងគ្រាប់បែក Barracuda ទៅកាន់អ៊ុយក្រែន ទោះបីជាការសម្រេចចិត្តលើការចែកចាយរបស់ពួកគេមិនទាន់ត្រូវបានធ្វើឡើងក៏ដោយ។

តំណាងអចិន្ត្រៃយ៍រុស្ស៊ីប្រចាំអង្គការសហប្រជាជាតិ លោក Vasily Nebenzya បាននិយាយកាលពីថ្ងៃទី០១ ខែតុលាថា ទីក្រុងមូស្គូ នឹងស្វែងរកការឆ្លើយតប ប្រសិនបើសហរដ្ឋអាមេរិកសម្រេចចិត្តផ្គត់ផ្គង់ដល់ រដ្ឋាភិបាលក្រុងគីវ ជាមួយនឹងមីស៊ីលTomahawk។

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ( Sergey Lavrov) បាននិយាយនៅដើមសប្តាហ៍នេះថា បញ្ហានៃលទ្ធភាពមីស៊ីលតម្រង់គោលដៅ Tomahawk របស់អាមេរិក សម្រាប់អ៊ុយក្រែន មិនទាន់បញ្ចប់ទេ ដោយបន្ថែមថា វិមានក្រឹមឡាំង មានទំនុកចិត្តថា ទោះបីជា មីស៊ីល Tomahawks ត្រូវបានដាក់ពង្រាយនៅអ៊ុយក្រែនក៏ដោយ ក៏ពួកវានឹងមិនផ្លាស់ប្តូរស្ថានភាពយោធានោះទេ៕