ភ្នំពេញ៖ អាជ្ញាធរខេត្តកំពង់ចាម រហូតដល់ពេលបច្ចុប្បន្ននេះ បានរៀបចំតភ្ជាប់បណ្ដាញអគ្គិសនី និងទឹកស្អាតឲ្យពលរដ្ឋប្រើប្រាស់នៅតាមភូមិនានាទូទាំងខេត្តសម្រេចបានស្ទើរតែ ១០០ភាគរយ ខណៈកំពុងបន្តខិតខំអនុវត្តការងារទាំងពីរនេះ ឲ្យសម្រេចតាមផែនការរបស់រាជរដ្ឋាភិបាល។
ក្នុងសន្និសីទសារព័ត៌មាន ស្តីពីវឌ្ឍនភាពមូលដ្ឋានឃុំសង្កាត់ លើកទិសដៅអនុវត្តបន្តរបស់ខេត្តកំពង់ចាម នៅថ្ងៃទី១ ខែកុម្ភៈ ឆ្នាំ២០២២ នាទីស្តីការគណៈរដ្ឋមន្ត្រី ឯកឧត្តម ខ្លូត ផន ប្រធានខេត្ត មានប្រសាសន៍ថា វិស័យអគ្គិសនីក្នុងខេត្តកំពង់ចាម រហូតមកដល់ពេលនេះ បានតភ្ជាប់បណ្ដាញប្រើប្រាស់ចំនួន៩១៤ភូមិ ស្មើនឹង៩៩,៧៨ភាគរយ ដែលមានពលរដ្ឋប្រើប្រាស់ចំនួនជាង ២០១ ០០០ខ្នងផ្ទះ ហើយនៅសល់តែចំនួន ២ភូមិប៉ុណ្ណោះ មិនទាន់មានការតភ្ជាប់អគ្គិសនីបានប្រើប្រាស់។
ឯកឧត្ដមបានបន្តថា សម្រាប់វិស័យទឹកស្អាតវិញ មានវិសាលភាពគ្រប់ដណ្ដប់នៅទូទាំងខេត្តបាន ១០៧ឃុំសង្កាត់ នៅសល់២ឃុំ ស្មើនឹង៩៨,១៦ភាគរយ និងភូមិចំនួន៨៧០ភូមិ ដោយបច្ចុប្បន្នមន្ត្រីជំនាញ កំពុងបន្តអនុវត្តនូវការនេះ ឲ្យសម្រេចតាមផែនការ។
បើតាមលោក លី ចាន់ធី ប្រធានមន្ទីររ៉ែ និងថាមពលខេត្តកំពង់ចាម បានឲ្យដឹងថា ចំពោះភូមិទាំងពីរ ដែលមិនទាន់មានអគ្គិសនីប្រើប្រាស់នោះ គឺនៅតំបន់ដាច់ស្រយ៉ាល ដោយមួយភូមិនៅស្រុកកងមាស ស្ថិតនៅតំបន់កោះកណ្ដាលទន្លេ ពិបាកតបណ្ដាញអគ្គិសនីចូល និងភូមិមួយទៀតនៅស្រុកស្ទឹងត្រង់ ស្ថិតក្នុងតំបន់ចម្ការកៅស៊ូ។
ចំណែកលោក ពូន រុន ប្រធានមន្ទីរឧស្សាហកម្ម សិប្បកម្ម និងនវានុវត្តន៍ខេត្តកំពង់ចាម លើកឡើងថា សម្រាប់ឃុំទាំងពីរ ដែលមិនទាន់មានបណ្ដាញទឹកស្អាតប្រើប្រាស់នោះ គឺស្ថិតនៅស្រុកស្ទឹងត្រង់ ជាតំបន់ដាច់ស្រយ៉ាល ឆ្ងាយពីប្រភពទឹក សក្ដានុពលសម្រាប់វិនិយោគមិនមានភាពអំណោយផល ពលរដ្ឋរស់នៅមិនប្រមូលផ្ដុំ ដែលមានលក្ខណៈរាយប៉ាយ ដែលធ្វើឲ្យអ្នកវិនិយោគមិនមានការចាប់អាម្មណ៍៕ អត្ថបទ៖ សុខ រិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
