មេដឹកនាំអឺរ៉ុប បានសម្តែងការគាំទ្រយ៉ាងទូលំទូលាយកាលពីថ្ងៃពុធ (១ តុលា) ចំពោះគំនិតនៃការប្រើប្រាស់ទ្រព្យសម្បត្តិរបស់រុស្ស៊ី ដែលត្រូវបានបង្កកនៅលោកខាងលិច ដើម្បីផ្តល់ជាប្រាក់កម្ចីចំនួន ១៤០ពាន់លានអឺរ៉ូ ដល់អ៊ុយក្រែន ប៉ុន្តែនឹងពិភាក្សាពីរឿងនេះបន្ថែមទៀតក្នុងរយៈពេល ៣សប្តាហ៍ខាងមុខ ដើម្បីដោះស្រាយទិដ្ឋភាពច្បាប់នៃដំណើរការនេះ។

ខណៈដែលការផ្តល់ហិរញ្ញប្បទានយោធារបស់សហរដ្ឋអាមេរិក សម្រាប់ទីក្រុងគីវ កំពុងត្រូវបានបញ្ចប់ ហើយរដ្ឋាភិបាលសហភាពអឺរ៉ុបជាច្រើកំពុងលំបាករឿងសារពើពន្ធ ពេលនេះគណៈកម្មការអឺរ៉ុបកំពុងស្នើឱ្យ EU ប្រើប្រាស់សមតុល្យសាច់ប្រាក់ពីមូលបត្រធនាគារកណ្តាលរុស្ស៊ីដែលត្រូវបង្កក ដើម្បីគាំទ្រដល់អ៊ុយក្រែន ក្នុងឆ្នាំ២០២៦ និង២០២៧។

លោក Antonio Costa ប្រធាននៃកិច្ចប្រជុំប្លុកអឺរ៉ុបបាននិយាយថា "មេដឹកនាំបានពិភាក្សាពីលទ្ធភាពនៃការប្រើប្រាស់ឱ្យកាន់តែប្រសើរឡើងនៃទ្រព្យសម្បត្តិបង្កករបស់រុស្ស៊ី ហើយនឹងបន្តការពិភាក្សានេះនៅក្នុងកិច្ចប្រជុំក្រុមប្រឹក្សាអឺរ៉ុបបន្ទាប់នៅក្នុងខែតុលា" ដោយសំដៅលើកិច្ចប្រជុំកំពូលសហភាពអឺរ៉ុបលើកក្រោយ ដែលគ្រោងធ្វើនៅថ្ងៃទី ២៣-២៤ ខែតុលា។

គួរឱ្យដឹងថា អ៊ុយក្រែននឹងសងប្រាក់កម្ចីនេះវិញ នៅពេលណាដែលរុស្ស៊ី សងសំណងសង្រ្គាមសម្រាប់ការខូចខាតដែលខ្លួនបានបង្កឡើង ចាប់តាំងពីប្រតិបត្តិការយោធាពិសេសក្នុងឆ្នាំ២០២២មក។ បែបនេះនឹងអនុញ្ញាតឱ្យអ៊ុយក្រែន ប្រើប្រាស់ប្រាក់ទាំងនោះក្នុងពេលឥឡូវនេះ ជាជាងការរង់ចាំរហូតដល់ទីក្រុងមូស្គូ បង់សំណងសង្រ្គាម៕