សហព័ន្ធអន្តរជាតិនៃកាកបាទក្រហម និងសង្គមអឌ្ឍចន្ទក្រហម (IFRC) បាននិយាយកាលពីថ្ងៃពុធ (១ តុលា) ថា មនុស្សរាប់ម៉ឺនគ្រួសារនៅតែពុំមានផ្ទះសម្បែងជ្រកកោនត្រឹមត្រូវឡើយ បន្ទាប់ពីគ្រោះរញ្ជួយដីដ៏ខ្លាំងក្លាមួយនៅអាហ្វហ្គានីស្ថាន ដែលគ្របដណ្ដប់ដោយវិបត្តិជុំទិសរួចទៅហើយ ហើយអ្នកស្រុកកំពុងត្រូវការទីជម្រកជាបន្ទាន់ ខណៈរដូវរងាខិតជិតមកដល់។

យោងតាមកាកបាទក្រហម IFRC បានឱ្យដឹងថា គ្រោះរញ្ជួយដីកម្រិត ៦,០ រ៉ិចទ័រ បានវាយប្រហារអាហ្វហ្គានីស្ថាន នៅយប់ថ្ងៃទី៣១ ខែសីហា ដល់ថ្ងៃទី១ ខែកញ្ញា កន្លងទៅ ដោយបានសម្លាប់មនុស្សជាង ២.២០០នាក់ មានអ្នករបួសរាប់ពាន់នាក់ បំផ្លាញផ្ទះសម្បែងជាង ៨ពាន់ខ្នង និងសម្លាប់បសុសត្វរាប់សែនក្បាល។

សហព័ន្ធ IFRC បាននិយាយក្នុងសេចក្តីថ្លែងការណ៍មួយថា "ជាមួយនឹងមនុស្សជាង ១,៣លាននាក់ រងផលប៉ះពាល់ដោយផ្ទាល់ និងដោយប្រយោល ក្រុមគ្រួសារជាច្រើននៅតែរស់នៅក្នុងតង់ ជម្រកបណ្តោះអាសន្ន ឬនៅកណ្ដាលវាលនៅឡើយ"។ សេចក្ដីថ្លែងការណ៍បន្តថា "រដូវរងាកំពុងចូលមកដល់ ហើយតង់មិនគ្រប់គ្រាន់ទេ ដោយក្រុមគ្រួសារត្រូវការទីជម្រកសុវត្ថិភាពដើម្បីរស់រាននៅប៉ុន្មានខែខាងមុខ"។

IFRC បានព្រមានថា អាហ្វហ្គានីស្ថានប្រឈមមុខនឹងវិបត្តិជុំទិស រួមទាំងកង្វះអាហារូបត្ថម្ភយ៉ាងរីករាលដាល និងការវិលត្រឡប់របស់ជនជាតិអាហ្វហ្គានីស្ថានប្រមាណជាង ១,៧លាននាក់ ពីអ៊ីរ៉ង់ និងប៉ាគីស្ថាន នៅក្នុងឆ្នាំ២០២៥នេះ៕