ក្រសួងការបរទេស និងសហប្រតិបត្តិការអន្តរជាតិ នៅរសៀលថ្ងៃទី២ ខែតុលា ឆ្នាំ២០២៥ នេះ បានឱ្យដឹងតាមបណ្ដាញសង្គមថា កម្ពុជា-រុស្ស៊ី ប្តេជ្ញាពង្រឹងកិច្ចសហប្រតិបត្តិការលើពាណិជ្ជកម្ម វិនិយោគ និងទេសចរណ៍។

លោកជំទាវ ជ្រឹង បុទុមរង្សី រដ្ឋលេខាធិការ បានទទួលជួបសម្តែងការគួរសម និងពិភាក្សាការងារជាមួយ ឯកឧត្តម Anatoly BOROVIK ឯកអគ្គរដ្ឋទូតរុស្ស៊ីប្រចាំកម្ពុជា នៅទីស្តីការក្រសួង នារសៀលថ្ងៃទី១ ខែតុលា ឆ្នាំ២០២៥។ ក្នុងជំនួបនេះ ភាគីទាំងពីរបានពិភាក្សាអំពី ការបន្តលើកកម្ពស់កិច្ចសហប្រតិបត្តិការទ្វេភាគីកម្ពុជា-រុស្ស៊ី និងប្តេជ្ញាចិត្តធ្វើការរួមគ្នាឱ្យបានជិតស្និទ្ធក្នុងការជំរុញកំណើនពាណិជ្ជកម្ម ការវិនិយោគ និងទេសចរណ៍ ពីរុស្ស៊ីមកកាន់កម្ពុជាបន្ថែមទៀត។ 

ជាមួយគ្នានេះ ភាគី កម្ពុជា-រុស្ស៊ី ក៏បានផ្លាស់ប្តូរយោបល់ លើគម្រោងរៀបចំសកម្មភាពរួមគ្នា ក្នុងការត្រៀមអបអរសាទរខួបលើកទី៧០ នៃទំនាក់ទំនងការទូតរវាងកម្ពុជា-រុស្ស៊ី នៅឆ្នាំ២០២៦ ខាងមុខនេះ។