អ្នកជំងឺ និងបុគ្គលិកមន្ទីរពេទ្យ និយាយថា អ្នកជំងឺលាងឈាមនៅមន្ទីរពេទ្យ Al Shifa ស្ថិតក្នុងទីក្រុងហ្កាហ្សា កំពុងជួបការលំបាកខ្លាំង សម្រាប់ការព្យាបាលរបស់ពួកគេ ដោយអ្នកជំងឺខ្លះព្រួយបារម្ភថា ការវាយប្រហារកំពុងបន្តរបស់អ៊ីស្រាអែលលើទីក្រុងមួយនេះ មានន័យថា ជាការបញ្ចប់ការព្យាបាលរបស់ពួកគេ ។

លោក Medhat Elewah គឺជាអ្នកជំងឺវ័យ ៥៩ឆ្នាំម្នាក់ ធ្លាប់មានពេលទទួលការលាងឈាមតម្រងនោមរយៈពេល ៤ម៉ោង និង៣ដងក្នុង ១សប្តាហ៍ ប៉ុន្តែបច្ចុប្បន្ន លោកមានពេលសាងឈាមត្រឹមតែ ២ម៉ោងប៉ុណ្ណោះ ។

ស្របពេលដែលកងកម្លាំងអ៊ីស្រាអែលវាយប្រហារកាន់តែជ្រៅទៅក្នុងទីក្រុងហ្កាហ្សា លោក Elewah មានការព្រួយបារម្ភចំពោះការបិទការព្យាបាល ។

លោកនិយាយថា ប្រតិបត្តិការសឹកនៅបន្តរបស់អ៊ីស្រាអែល បានធ្វើឲ្យអ្នកជំងឺខ្លាចខ្លាំងណាស់ ក្នុងនោះពួកគេមួយចំនួន លែងហ៊ានមកព្យាបាលទៀតហើយ ។

ពេលអង្គុយនៅក្នុងបន្ទប់លាងឈាម លោក Elewah និយាយថា អ្នកដែលមិនមកលាងឈាម ពួកគេប្រឈមនឹងសេចក្តីស្លាប់ ។

លោក Ahmed Khalaf គឺជាបុរសម្នាក់ទៀតដែលមកទទួលការព្យាបាលដែរនោះ បាននិយាយបន្ទរនូវក្តីបារម្ភស្រដៀងគ្នា ដោយលោកនិយាយថា សម្រាប់អ្នកជំងឺដូចជារូបលោកផ្ទាល់ កង្វះខាតពេលលាងឈាមគ្រប់គ្រាន់ ក្លាយជាកម្មវត្ថុនៃសេចក្តីស្លាប់បន្តិចម្តងៗ ។

លោកថា សម្រាប់អ្នកជំងឺខ្សោយតម្រងនោម ការព្យាបាលតែមួយគត់របស់ពួកគេ គឺមានតែម៉ាស៊ីនមួយនេះ ។

លោក Ahmed al-Shandaghly គឺជាគ្រូពេទ្យបឋមនៅមន្ទីរពេទ្យ Al Shifa និយាយថា មាននូវកង្វះខាតធ្ងន់ធ្ងរថ្នាំព្យាបាល ហើយនិងទឹកដែលត្រូវការសម្រាប់លាងឈាម ហើយអ្នកជំងឺដែលពុំទទួលបានការព្យាបាលក្នុងរយៈពេលប៉ុន្មានថ្ងៃកន្លងមកនេះ ពួកគេនឹងជួបបញ្ហាកាន់តែស្មុគស្មាញខ្លាំង ៕