បន្ទាយមានជ័យ៖ ប្រជាពលរដ្ឋមកពីគ្រប់ទិសទី នៅបន្តទៅលើកទឹកចិត្តដល់វីរកងទ័ព និង​ប្រជា​ពលរដ្ឋ​នៅ​ភូមិ​ព្រៃចាន់ ឃុំអូរបីជាន់ ស្រុកអូរជ្រៅ ជាមួយនឹងការផ្ដល់នូវគ្រឿងឧបភោគបរិភោគ ម្ហូប​អាហារ ទឹកសុទ្ធ និងភេសជ្ជៈជាដើម ដើម្បីបង្ហាញពីកម្លាំងសាមគ្គីជាតិ ក្នុង​ការ​ការ​ពារ​បូរណ​ភាព​ទឹកដី។

ក្នុង​ពេលនាំយកនូវម្ហូបអាហារ ផ្ដល់ដល់កងទ័ព និងប្រជាពលរដ្ឋនៅភូមិព្រៃចាន់ នៅថ្ងៃទី៣ ខែ​តុលា​ ឆ្នាំ២០២៥ លោកស្រី លី មាន មកពីក្រុងសិរីសោភ័ណ បានលើកឡើង ក្នុងដំណាក់នេះ កម្លាំង​សាមគ្គីជាតិខ្មែរ ទាំងរាជរដ្ឋាភិបាល និងប្រជាពលរដ្ឋកំពុងពូតដៃគ្នា ក្នុងការការពារទឹកដី ប្រឆាំង​នឹង​អំពើឈ្លានពាន ។

លោកស្រីបានបន្តថា ក្នុងនាមជាសមរភូមិក្រោយ នៅតែគាំទ្រចំណាត់ការរបស់រាជរដ្ឋាភិបាល និង​បន្ត​លើក​ទឹក​ចិត្ត​ដល់​សមរភូមិមុខ មិនបោះបង់គ្នាជាដាច់ខាត ជាមួយនឹងការ​អំពាវ​នាវ​យ៉ាង​ទទូច​ដល់​សហគមន៍​អន្តរជាតិ ជួយដោះស្រាយ ដើម្បីបញ្ចប់នូវបញ្ហាជម្លោះព្រំដែនកម្ពុជា-ថៃ ។

ក្នុង​ពេល​ធ្វើ​សកម្មភាពសំអាតបរិស្ថាន នៅភូមិព្រៃចាន់ ក្បែរទីតាំង​កងទ័ព​ថៃ​យក​បន្លា​លួស​ព័ទ្ធ​យក​ដី​ខ្មែរ​ យុវជនស្ម័គ្រចិត្តកាកបាទក្រហមកម្ពុជាដែលជាអ្នករស់នៅភូមិព្រៃចាន់ បាន​បង្ហាញ​នូវ​ការ​សោក​ស្ដាយ ចំពោះទង្វើរបស់កងទ័ពថៃ ដែលយកបន្លាលួសមកព័ទ្ធរំលោភទឹកដីកម្ពុជា ។ ពួក​គេ​ក៏នៅតែបង្ហាញនូវការព្រួយបារម្ភ ខ្លាចកងទ័ពថៃធ្វើការបាញ់ប្រហារមកលើកងទ័ព និង​អ្នក​ភូមិ​ ហើយក៏មិនទាន់មានអារម្មណ៍មូល ចង់សិក្សារៀនសូត្រនោះដែរ។

គួរ​បញ្ជាក់ថា គិតត្រឹមព្រឹកថ្ងៃទី៣ ខែតុលានេះ ស្ថានភាពនៅភូមិព្រៃចាន់ ពុំមានព្រឹត្តិការណ៍អ្វី គួរ​ឲ្យ​កត់​សម្គាល់​នោះ​ទេ ខណៈដែលកងកម្លាំងកម្ពុជា នៅតែបន្តតាមដាន និងការពារ​បូរណ​ភាព​ទឹកដីដោយស្មារតីមុះមុត និងអងអាចក្លាហាន៕ អត្ថបទ បាន សុខរិទ្ធិ