មន្ត្រីអាមេរិកម្នាក់ និងប្រភពចំនួន៣ ផ្សេងទៀតបាននិយាយថា បំណងរបស់រដ្ឋបាលលោកប្រធានាធិបតីអាមេរិក Donald Trump ក្នុងការបញ្ជូនមីស៊ីលតម្រង់គោលដៅ Tomahawk រយៈចម្ងាយឆ្ងាយទៅកាន់អ៊ុយក្រែន ប្រហែលជាមិនអាចដំណើរការបានទេ ដោយសារឃ្លាំងស្តុកបច្ចុប្បន្នត្រៀមសម្រាប់តែកងទ័ពជើងទឹកសហរដ្ឋអាមេរិក និងការប្រើប្រាស់ផ្សេងៗទៀតប៉ុណ្ណោះ។

អនុប្រធានាធិបតីអាមេរិក លោក JD Vance បាននិយាយកាលពីថ្ងៃអាទិត្យចុងសប្ដាហ៍មុនថា ទីក្រុងវ៉ាស៊ីនតោន កំពុងពិចារណាលើសំណើអ៊ុយក្រែន នៃមីស៊ីល Tomahawk រយៈចម្ងាយ ២.៥០០គីឡូម៉ែត្រ ដែលអាចបង្កើតការបំផ្លិចបំផ្លាញយ៉ាងជ្រៅក្នុងទឹកដីរុស្ស៊ី រួមទាំងទីក្រុងមូស្គូផងដែរ។ កាលពីថ្ងៃពុធសប្ដាហ៍នេះ ទីភ្នាក់ងារព័ត៌មានរ៉យទ័ររាយការណ៍ថា អាមេរិកនឹងផ្តល់ឱ្យអ៊ុយក្រែន នូវចារកម្មសម្ងាត់លើគោលដៅហេដ្ឋារចនាសម្ព័ន្ធថាមពលចម្ងាយឆ្ងាយក្នុងប្រទេសរុស្ស៊ី។

យ៉ាងណាមិញ ប្រភពដែលដឹងពីការហ្វឹកហ្វឺន និងការផ្គត់ផ្គង់មីស៊ីល Tomahawk បានចោទសួរពីលទ្ធភាពនៃការផ្តល់មីស៊ីលដែលមានរយៈចម្ងាយរាប់ពាន់គីឡូម៉ែត្រនេះ។ ប្រភពមន្ត្រីអាមេរិកសង្កត់ធ្ងន់ថា អាវុធរយៈចម្ងាយខ្លីអាចនឹងត្រូវផ្គត់ផ្គង់ជំនួសវិញដល់ទីក្រុងគីវ ដែលជារឿយៗត្រូវប្រើប្រាស់ដោយយោធាសម្រាប់បេសកកម្មវាយប្រហារពីដីគោក។

មន្ត្រីរូបនេះបន្តថា អាមេរិក អាចនឹងពិនិត្យមើលលទ្ធភាពនៃការអនុញ្ញាតឱ្យសម្ព័ន្ធមិត្តអឺរ៉ុប ទិញអាវុធរយៈចម្ងាយឆ្ងាយផ្សេងទៀត រួចហើយផ្គត់ផ្គង់ដល់អ៊ុយក្រែន ប៉ុន្តែរឿងមីស៊ីល Tomahawk នេះទំនងជាមិនអាចទៅរួចនោះទេ។ វិមានក្រឹមឡាំងបានព្រមានកាលពីថ្ងៃព្រហស្បតិ៍ថា ប្រសិនបើសហរដ្ឋអាមេរិក ផ្តល់ Tomahawk ដល់អ៊ុយក្រែន នោះនឹងបង្កឱ្យមានកំណើនភាពតានតឹងដ៏គ្រោះថ្នាក់ថ្មីមួយរវាងរុស្ស៊ី និងលោកខាងលិច៕