សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តី​ថ្លៃ​ថ្នូរ​ និងសុភមង្គល ព្រះប្រធានកិត្តិយស កាកបាទក្រហមកម្ពុជា ប្រោសព្រះរាជទាន ព្រះរាជ​ទ្រព្យ​ចំនួន​២​ម៉ឺនដុល្លារ សហរដ្ឋអាមេរិក ជូនដល់កាកបាទក្រហមកម្ពុជា សម្រាប់ជួយប្រជាជនរងគ្រោះ ដោយ​សារ​ទឹកជំនន់។

នៅព្រឹកថ្ងៃ ទី៣ ខែតុលា ឆ្នាំ២០២៥នេះ សម្ដេចព្រះមហាក្សត្រី នរោត្ដម មុនិនាថ សីហនុ ព្រះ​វរ​រាជ​មាតា​ជាតិខ្មែរ ព្រះប្រធានកិត្តិយស កាកបាទក្រហមកម្ពុជា ប្រោសព្រះរាជទាន ព្រះរាជ​ទ្រព្យ​ចំនួន​២​ម៉ឺនដុល្លារសហរដ្ឋអាមេរិក ជូនដល់កាកបាទក្រហមកម្ពុជា សម្រាប់ជួយ​ប្រជាជន​រង​គ្រោះ​ដោយ​សា​រទឹកជំនន់ នៅតាមបណ្ដារាជធានីខេត្ត ទូទាំងព្រះរាជាណាចក្រកម្ពុជា។ ព្រះរាជ​ទាន​ដ៏​ថ្លៃ​ថ្លា​នេះ នាំមកជូនដោយសម្ដេចព្រះមហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រី​ក្រសួង​ព្រះបរមរាជវាំង ទទួលដោយលោកជំទាវ ពុំ ចន្ទីនី អគ្គលេខាធិការ នាទីស្នាក់ការកណ្ដាល កាក​បាទក្រហមកម្ពុជា។

ក្នុង​ឱកាសប្រគល់ទទួលនោះ សម្ដេចមហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រី ក្រសួង​ព្រះបរមរាជវាំងបានមានប្រសាសន៍ថា ដោយមើលឃើញពីទុក្ខលំបាករបស់ប្រជារាស្រ្ត ដែល​រ​ងគ្រោះដោយទឹកជំនន់ ព្រះអង្គបានសព្វព្រះរាជហឫទ័យ ប្រោសព្រះរាជទាន ព្រះ​រាជ​ទ្រព្យ​ចំនួន​២​ម៉ឺនដុល្លារសហរដ្ឋអាមេរិកដល់ កាកបាទក្រហមកម្ពុជា ដែលមានសម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែនជាប្រធាន សម្រាប់យកទៅជួយជនរងគ្រោះ ដែលរងផលប៉ះពាល់ទាំងអស់ បណ្ដាល​មកពីជំនន់ទឹកភ្លៀង នៅតាមបណ្ដារាជធានីខេត្ត ទូទាំងព្រះរាជាណាចក្រកម្ពុជា។

ខណះ​នោះលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បាននាំប្រសាសន៍របស់ សម្ដេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ជម្រាបជូនដល់ គណៈប្រតិភូព្រះបរមរាជវាំងថា ខ្ញុំ​ម្ចាស់​ព្រម​ទាំងសហការីទាំងអស់នៃ កាកបាទក្រហមកម្ពុជា មានសេចក្តីរីករាយឥតឧបមា ដោយ​បាន​ទទួល​ព្រះរាជទានចំនួន២ម៉ឺនដុល្លារសហរដ្ឋអាមេរិក ដែលជាព្រះរាជទានដ៏ថ្លៃថ្លារបស់ សម្ដេច​ព្រះ​មហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតតាមរយៈ សម្ដេច​មហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រី ក្រសួងព្រះបរមរាជវាំង សម្រាប់​ចូល​រួម​ជួយ​ជន​រងគ្រោះ ដែលបណ្ដាលមកពីទឹកជំនន់ នៅតាមបណ្ដារាជធានីខេត្ត ទូទាំងព្រះ​រា​ជា​ណា​ចក្រ​កម្ពុជា​។

ខ្ញុំម្ចាស់សូមព្រះបរមរាជាអនុញ្ញាត ថ្លែងអំណរគុណ ព្រះរាជគុណដ៏ខ្ពង់ខ្ពស់ជាទីបំផុត ថ្វាយ​សម្ដេច​ព្រះ​មហាក្សត្រី ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុត ព្រះអង្គ​តែង​តែ​សព​ព្រះរាជហឫទ័យ ប្រោសព្រះរាជទានព្រះរាជទ្រព្យ ដល់សកម្មភាពមនុស្សធម៌របស់ កាក​បាទ​ក្រហម​កម្ពុជា គ្រប់ពេលវេលា ដែលប្រជារាស្ត្រកម្ពុជា មានទុក្ខ​លំបាក​ដោយ​គ្រោះ​ធម្មជា​តិ​ផ្សេង​ៗ​។ ខ្ញុំម្ចាស់សូមបួងសួងដល់គុណបុណ្យ ព្រះរតនត្រ័យ វត្ថុស័ក្កិសិទ្ធនានាក្នុងលោក ទេវតា​រក្សា​ព្រះមហា​ ស្វេតច្ឆត្រ ព្រះបារមីនៃ ព្រះវិញ្ញាណក្ខន្ធអតីត ព្រះមហាក្សត្រ ព្រះមហាក្សត្រ​យានី​ខ្មែរ​គ្រប់​ព្រះអង្គ ជាពិសេសព្រះវិញ្ញាណក្ខន្ធ ព្រះករុណា ព្រះបរមរតនៈកោដ្ឋ សូមព្រះមេត្តាប្រោស ព្រះរាជ​ទានព្រះពរជ័យ បវរមហាប្រសើរថ្វាយ សម្ដេចព្រះមហាក្សត្រី ព្រះវររាជមាតាជាតិខ្មែរ ជា​ទី​គោរព​សក្ការៈដ៏ខ្ពង់ខ្ពស់បំផុត សូមព្រះអង្គមានព្រះបរមសុខគ្រប់ប្រការ គង់ប្រថាប់ជាមហាម្លប់ ដ៏​ត្រជាក់ សម្រាប់ប្រជារាស្រ្តនៅទូទាំងព្រះរាជាណាចក្រកម្ពុជា ជាកូនចៅ ចៅទួត រប​ស់​ព្រះ​អង្គ​ជ្រក​កោន​តរៀងទៅ៕ អត្ថបទ៖ សំ ងីម