អ៊ីស្រាអែល បានប្រឈមមុខទៅនឹងការថ្កោលទោស និងការតវ៉ាពីអន្តរជាតិ កាលពីថ្ងៃព្រហស្បតិ៍ ទី២ ខែតុលា បន្ទាប់ពីយោធារបស់ប្រទេសនេះបានស្ទាក់ចាប់ទូកស្ទើរតែទាំងអស់ប្រមាណ៤០គ្រឿងនៅក្នុងក្បួនទូកដឹកជំនួយចូលទៅកាន់តំបន់ហ្កាហ្សា ហើយបានចាប់ខ្លួនសកម្មជនបរទេសជាង៤៥០នាក់រួមទាំងអ្នកធ្វើយុទ្ធនាការជនជាតិស៊ុយអែត នាង Greta Thunberg។

កាមេរ៉ាដែលផ្សាយផ្ទាល់ពីទូកនានា បានបង្ហាញទាហានអ៊ីស្រាអែលប្រដាប់អាវុធមានពាក់មួកសុវត្ថិភាព និងវ៉ែនតាពេលយប់កំពុងឡើងលើទូក ខណៈអ្នកដំណើរពាក់អាវពោងការពារជីវិតបានលើកដៃឡើងលើ។ វីដេអូមួយពីក្រសួងការបរទេសអ៊ីស្រាអែលបានបង្ហាញថា នាង Thunberg ដែលជាអ្នកដំណើរលេចធ្លោបំផុតកំពុងអង្គុយលើនាវាដែលហ៊ុមព័ទ្ធដោយទាហាន។

បាតុករគាំទ្រប៉ាឡេស្ទីន បានចេញធ្វើបាតុកម្មនៅតាមផ្លូវក្នុងទីក្រុងនានានៅទូទាំងទ្វីបអឺរ៉ុប ព្រមទាំងនៅទីក្រុង Karachi ទីក្រុងBuenos Aires និងទីក្រុង Mexico City ដើម្បីតវ៉ាប្រឆាំងការចាប់ខ្លួនសកម្មជនធ្វើឡើងដោយអ៊ីស្រាអែលរយៈពេលពីរឆ្នាំក្នុងការវាយលុកលើតំបន់ហ្កាហ្សា។ ជាមួយគ្នានេះ សហជីពជាច្រើននៅអ៊ីតាលី បានអំពាវនាវការធ្វើបាតុកម្មជាទូទៅនៅថ្ងៃសុក្រនេះ។

នាវា Global Sumud ដែលជាអ្នករៀបចំការធ្វើដំណើរបាននិយាយនៅលើបណ្តាញ X ថា អ្នកស្ម័គ្រចិត្តជាង៤៥០នាក់ត្រូវបានឃុំខ្លួន។ កាលពីពេលមុននេះ អ្នករៀបចំបាននិយាយថាពួកគេមួយចំនួនត្រូវបានផ្ទេរទៅកាន់នាវាដឹកទំនិញធំមួយមុនពេលត្រូវបានគេនាំយកទៅកាន់ឆ្នេរ។