របាយការណ៍របស់រដ្ឋាភិបាលនៅថ្ងៃសុក្រ (៣ តុលា) នេះបាននិយាយថា ចំនួនអ្នកស្លាប់នៅក្នុងប្រទេសវៀតណាម ដោយសារព្យុះទីហ្វុង Bualoi និងទឹកជំនន់ដែលព្យុះនេះបង្កឡើង បានបន្តកើនឡើងឥតឈប់ឈរដល់ ៥១នាក់ហើយ ជាមួយនឹងការខូចខាតទ្រព្យសម្បត្តិមានលើសពី ៦០០លានដុល្លារអាមេរិក ខណៈធនាគារកណ្តាលជំរុញឱ្យធនាគារនានាជួយដល់អាជីវកម្មដែលរងផលប៉ះពាល់។

ព្យុះ Bualoi បានបោកបក់ដល់ដីគោកកាលពីថ្ងៃចន្ទដើមសប្ដាហ៍នេះ នៅភាគខាងជើងប្រទេសវៀតណាម ដោយនាំមកនូវរលកសមុទ្រធំៗ ខ្យល់បក់ខ្លាំង និងភ្លៀងធ្លាក់យ៉ាងគំហុក ដែលបានបណ្តាលឱ្យមនុស្សជាង ១០នាក់ទៀតបាត់ខ្លួន និងរាប់រយនាក់រងរបួស នេះបើយោងតាមរបាយការណ៍ពីទីភ្នាក់ងារគ្រប់គ្រងគ្រោះមហន្តរាយរបស់រដ្ឋាភិបាលវៀតណាម។

ទីភ្នាក់ងារនេះក៏បានបង្កើនការប៉ាន់ប្រមាណរបស់ខ្លួនអំពីការខូចខាតទ្រព្យសម្បត្តិដែលបណ្តាលមកពីព្យុះទីហ្វុង និងទឹកជំនន់ ដល់តួលេខ ១៥,៩សែនកោដិដុង ឬប្រមាណជា ៦០៣លានដុល្លារអាមេរិក ដោយកើនឡើងពីចំនួន ៤៣៥,៨លានដុល្លារ នៅក្នុងរបាយការណ៍មុនដែលបានចេញផ្សាយកាលពីថ្ងៃព្រហស្បតិ៍។

របាយការណ៍និយាយថា ព្យុះទីហ្វុងនេះបានបំផ្លាញផ្លូវថ្នល់ សាលារៀន និងអគារការិយាល័យយ៉ាងធ្ងន់ធ្ងរ បណ្តាលឱ្យដាច់បណ្តាញអគ្គិសនី ដែលប៉ះពាល់ប្រជាជនរាប់ម៉ឺនគ្រួសារ ហើយផ្ទះសម្បែងជាង ២៣ម៉ឺនខ្នង បានរងការខូចខាត ឬជន់លិច ដោយតួលេខជិត ៨៩.០០០ហិកតា នៃស្រូវ និងដំណាំផ្សេងទៀតត្រូវបានបំផ្លិចបំផ្លាញ៕