ប្រធានាធិបតីកូរ៉េខាងត្បូង លោក Lee Jae Myung បាននិយាយនៅថ្ងៃសុក្រ (៣ តុលា) នេះថា ប្រទេសកូរ៉េខាងជើង គួរតែពិចារណាឡើងវិញរឿងបន្តដំណើរការជួបជុំគ្រួសារដែលបែកខ្ញែកគ្នា ក្នុងអំឡុងសង្គ្រាមកូរ៉េឆ្នាំ១៩៥០ ដល់ឆ្នាំ១៩៥៣ ដែលជាផ្នែកនៃវិធានការសហប្រតិបត្តិការមនុស្សធម៌រវាងប្រទេសជិតខាងទាំងពីរ។

ថ្លែងនៅក្នុងកិច្ចប្រជុំមួយនៅមុនថ្ងៃសម្រាកបុណ្យជាតិ លោក Lee បានប្រាប់ប្រជាជនកូរ៉េខាងត្បូង ដែលមានសាច់ញាតិនៅកូរ៉េខាងជើងថា លោកសង្ឃឹមថានឹងមានការបន្ធូរបន្ថយអរិភាព និងការបន្តកិច្ចសហប្រតិបត្តិការបែបនេះឡើងវិញ។

ក្នុងអំឡុងពេលដំណើរទស្សនកិច្ចរបស់លោកទៅកាន់កោះព្រំដែនជាមួយកូរ៉េខាងជើង លោក Lee បាននិយាយថា នោះជាការទទួលខុសត្រូវផ្នែកនយោបាយសម្រាប់កូរ៉េទាំងពីរក្នុងការអនុញ្ញាតឱ្យគ្រួសារដែលបែកបាក់គ្នា អាចទំនាក់ទំនងគ្នាទៅវិញទៅមក ក្រោមទស្សនៈមនុស្សធម៌។

យោងតាមក្រសួងបង្រួបបង្រួមរបស់កូរ៉េខាងត្បូង បានឱ្យដឹងថា ប្រជាជនកូរ៉េខាងត្បូងប្រហែល ៣៦.០០០នាក់ ដែលឃ្លាតចេញពីគ្រួសាររបស់ពួកគេនៅកូរ៉េខាងជើង បានស្នើរដ្ឋាភិបាលសម្រាប់ការជួបជុំគ្នាឡើងវិញ។ ការជួបជុំគ្រួសារចុងក្រោយបំផុតរវាងកូរ៉េទាំងពីរ ត្រូវរៀបចំឡើងក្នុងខែសីហា ឆ្នាំ២០១៨ ប៉ុក៏ត្រូវផ្អាក ស្របពេលទំនាក់ទំនងអន្តរកូរ៉េមានភាពត្រជាក់ស្រេប ចាប់តាំងពីពេលនោះមក។ កាលពីខែកុម្ភៈ កូរ៉េខាងជើងត្រូវរាយការណ៍ថាបានរុះរើទីកន្លែងដែលប្រើប្រាស់សម្រាប់ការជួបជុំគ្រួសារ នៅក្នុងសញ្ញានៃទំនាក់ទំនងកាន់តែយ៉ាប់យ៉ឺនជាមួយកូរ៉េខាងត្បូង៕