លោកឧត្តមសេនីយ៍ Hossein Nejat នៃកងឆ្មាំបដិវត្តន៍ឥស្លាម (IRGC) បាននិយាយថា យោធាអ៊ីរ៉ង់ បានបង្កើនសមត្ថភាពវាយលុករបស់ខ្លួន ១០ដង ចាប់តាំងពីសង្រ្គាមរយៈពេល ១២ថ្ងៃ ជាមួយអ៊ីស្រាអែល។

ទូរទស្សន៍រដ្ឋរបស់អ៊ីរ៉ង់បានដកស្រង់លោកដែលបាននិយាយថា៖«ប្រសិនបើរបបជ្វីហ្វ ធ្វើកំហុសដដែលម្តងទៀត (សំដៅលើការវាយប្រហារលើអ៊ីរ៉ង់ ក្នុងខែមិថុនា) សមត្ថភាពវាយលុករបស់យើង គឺធំជាងក្នុងអំឡុងពេលសង្រ្គាម ១២ថ្ងៃ រហូតដល់ដប់ដង រួចទៅហើយ»។

លោកបានបន្ថែមថា អ៊ីរ៉ង់ក៏បានដោះស្រាយរាល់ការខ្វះខាតផ្នែកការពារជាតិ ដែលបានកំណត់ក្នុងអំឡុងពេលជម្លោះលើកមុន។

នៅថ្ងៃទី ១៣ ខែមិថុនា អ៊ីស្រាអែលបានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់។ រយៈពេលតិចជាង ២៤ម៉ោងក្រោយមក ទីក្រុងតេអេរ៉ង់ បានវាយប្រហារសងសឹក។ សហរដ្ឋអាមេរិក បានចូលក្នុងជម្លោះនេះ រយៈពេល ៩ថ្ងៃ បន្ទាប់ពីកើនឡើងភាពតានតឹង ដោយវាយប្រហារទីតាំងនុយក្លេអ៊ែរអ៊ីរ៉ង់ នៅទីក្រុង Fordow, Natanz និង Isfahan។ នៅល្ងាចថ្ងៃទី ២៣ ខែមិថុនា អ៊ីរ៉ង់ បានវាយប្រហារមូលដ្ឋានអាកាស Al Udeid ក្នុងប្រទេសកាតា ដែលជាមូលដ្ឋានទ័ពអាកាសដ៏ធំបំផុតរបស់អាមេរិក នៅមជ្ឈិមបូព៌ា។ ប្រធានាធិបតីអាមេរិក លោក ដូណាល់ ត្រាំ បានប្រកាសថា អ៊ីស្រាអែល និងអ៊ីរ៉ង់ បានព្រមព្រៀងបទឈប់បាញ់។ បទឈប់បាញ់ បានចូលជាធរមាន នៅថ្ងៃទី ២៤ ខែមិថុនា៕