ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយនៅឯកិច្ចប្រជុំពេញអង្គនៃក្លិបពិភាក្សា Valdai ថា ការបដិសេធឧស្ម័នរបស់រុស្ស៊ី បានធ្វើឲ្យតម្លៃម្ហូបអាហារកើនឡើងនៅអឺរ៉ុប និងធ្វើឲ្យប្រជាជនសហភាពអឺរ៉ុប កាន់តែក្រីក្រឡើង។

លោក ពូទីន បាននិយាយថា៖«ការបដិសេធឧស្ម័នរុស្ស៊ីនៅអឺរ៉ុប បណ្តាលឲ្យមានការកើនឡើងតម្លៃ   ការផលិតជីរ៉ែដោយផ្អែកលើឧស្ម័ននេះនៅអឺរ៉ុប បានក្លាយទៅជាគ្មានផលចំណេញ ហើយរោងចក្រនានា ចាប់ផ្តើមបិទ។ តម្លៃជីកើនឡើង ដែលប៉ះពាល់ដល់កសិកម្ម។ តម្លៃអាហារ កើនឡើង ដែលជះឥទ្ធិពលដល់កម្លាំងទិញរបស់ប្រជាជន។ នោះហើយ គឺជាមូលហេតុដែលធ្វើឲ្យប្រជាជនធ្វើការតវ៉ានៅតាមដងផ្លូវ»។

យោងតាមការប៉ាន់ប្រមាណរបស់ទីភ្នាក់ងារសារព័ត៌មាន TASS ដោយផ្អែកលើទិន្នន័យរបស់មជ្ឈមណ្ឌល Bruegel ការផ្គត់ផ្គង់ឧស្ម័នសរុបរបស់រុស្ស៊ីទៅកាន់សហភាពអឺរ៉ុប ក្នុងអំឡុងពេល ៩ខែនៃឆ្នាំ ២០២៥ មានចំនួនសរុបប្រហែល ២៧,៦ ពាន់លានម៉ែត្រគូប។ ដូច្នេះ រុស្ស៊ីជាប់ចំណាត់ថ្នាក់លេខ ៤ បន្ទាប់ពីន័រវែស អាមេរិក និងអាល់ហ្សេរី៕