​វាយ​កូន​បាល់៖ ​កីឡាករ​អា​ហ្ស​ង់​ទីន Juan Martin del Potro អតីត​ជើងឯក Grand Slam, US Open បានប្រកាស​ពី​ការវិល​ត្រលប់មក​ប្រឡូក​កីឡាវាយ​កូន​បាល់​វិញ​ក្រោយ​អវត្តមាន​ជិត ៣ឆ្នាំ​។​ ​​កីឡាករ​វ័យ ៣៣ឆ្នាំ​រូបនេះ​បាន​ចូលរួម​ការប្រកួត​ចុងក្រោយ​បំផុត​នៅ​ខែមិថុនា ​ឆ្នាំ២០១៩ ហើយ​នៅពេលនេះ​បានប្រកាស​ពី​ការចូលរួម​ការប្រកួត​កម្មវិធី​ចំនួន​ពីរ​នៅ​ទីក្រុង Buenos Aires និង Rio de Janeiro​។

​​Martin del Potro បានទទួល​ការវះកាត់​ជង្គង់​ដល់​ទៅ ៤លើក​តាំង​ប្រកួត​ចុងក្រោយ​នៅ​កម្មវិធី​មួយ​ត្រៀម Wimbledon កាលពី​ឆ្នាំ២០១៩​។ ​​អតីត​កីឡាករ​លំដាប់​លេខ ៣ ពិភពលោក​រូបនេះ​នៅពេលនេះ​ធ្លាក់​ឈរ​លំដាប់ថ្នាក់​លេខ ៧៥៧ ពិភពលោក​។ ​​រំលឹកថា Martin del Potro ធ្លាប់​យកឈ្នះ Roger Federer នៅ​វគ្គ​ផ្តាច់ព្រ័ត្រ​លើក​ពាន US Open កាលពី​ឆ្នាំ២០០៩ ដែលជា​ជើងឯក Grand Slam តែមួយគត់​របស់គេ​។​ ​​ក្រោយមក Del Potro ក៏​ធ្លាប់​ឡើងដល់​វគ្គ​ពាក់កណ្តាល​ផ្តាច់ព្រ័ត្រ Wimbledon ផងដែរ​នៅ​ឆ្នាំ២០១៣ ដោយ​ចាញ់ Novak Djokovic និង​ធ្លាប់​ឡើង​វគ្គ​ពាក់កណ្តាល​ផ្តាច់ព្រ័ត្រ French Open ពីរលើក​ផងដែរ​៕

​អត្ថបទ​៖​នាង សុភា​វុ​ធ