ការស្ទាក់ចាប់របស់អ៊ីស្រាអែល ចំពោះកងនាវាចរអន្តរជាតិដែលដឹកជំនួយមនុស្សធម៌ទៅកាន់តំបន់ហ្កាហ្សា បានបង្កឲ្យមានការថ្កោលទោសជាសកល ដោយរដ្ឋាភិបាលអឺរ៉ុប បានជំរុញឲ្យអ៊ីស្រាអែលធានាសុវត្ថិភាពពលរដ្ឋរបស់ខ្លួន នៅលើនាវាតម្រង់ទៅតំបន់ហ្កាហ្សា។ ហើយក្រុមអ្នកតវ៉ាទូទាំងពិភពលោក បានថ្កោលទោស ចំពោះការស្ទាក់ចាប់នេះ ដោយអំពាវនាវឲ្យមានការដាក់ទណ្ឌកម្មកាន់តែធ្ងន់ ដើម្បីជាការឆ្លើយតប។

គួរបញ្ជាក់ថា កាលពីថ្ងៃព្រហស្បតិ៍ (ទី២ ខែតុលា) ក្រសួងការបរទេសអ៊ីស្រាអែល បានឲ្យដឹងនៅក្នុងសេចក្តីថ្លែងការណ៍មួយថា កងទ័ពជើងទឹកអ៊ីស្រាអែល បានបញ្ចប់ការកាន់កាប់លើក្រុមនាវាផ្ដល់ជំនួយ Global Sumud Flotilla (GSF) ដែលតម្រង់ឆ្ពោះទៅតំបន់ហ្កាហ្សា។

GSF ដែលរួមនាវាប្រមាណជា ៥០០គ្រឿង ជាមួយនឹងអ្នកស្ម័គ្រចិត្តជាង ៥០០នាក់ មកពីជាង ៤០ប្រទេស មានគោលបំណងប្រឆាំងនឹងការរាំងខ្ទប់របស់កងទ័ពជើងទឹកអ៊ីស្រាអែល ហើយផ្តល់អាហារ និងជំនួយផ្នែកវេជ្ជសាស្រ្តដល់ប្រជាជនប៉ាឡេស្ទីន។ នៅថ្ងៃព្រហស្បតិ៍នោះ សមាជិកសភាក្រិក បានថ្កោលទោសយ៉ាងខ្លាំង ចំពោះការស្ទាក់ចាប់នេះ ដោយជំរុញឲ្យរដ្ឋាភិបាលធានាសុវត្ថិភាពរបស់ពលរដ្ឋក្រិក នៅលើទូកទាំងនោះ រួមទាំងសមាជិកសភាក្នុងតំណែងផងដែរ។ ចំណែករដ្ឋមន្ត្រីការបរទេសអ៊ីតាលី លោក Antonio Tajani បានបញ្ជាក់ថា ជនជាតិអ៊ីតាលីប្រហែល ៤០នាក់ ត្រូវបានឃុំខ្លួន ដោយនិយាយថា សកម្មភាពរបស់អ៊ីស្រាអែល បានទៅ «ហួសពីការការពារខ្លួន» ស្របច្បាប់ហើយ។ មនុស្សរាប់ពាន់នាក់បានប្រមូលផ្តុំគ្នា នៅទីក្រុង Rome, Milan, Naples និងទីក្រុងផ្សេងទៀត បន្ទាប់ពីកងនាវាជំនួយទាំងនោះ ត្រូវបានរឹបអូស។ នៅប្រទេសអាល្លឺម៉ង់ ក្រុមមន្ត្រីបានឲ្យដឹងថា ពួកគេកំពុងទាក់ទងជាមួយអ៊ីស្រាអែល ដើម្បីធានាសុវត្ថិភាពអ្នកដំណើរ ស្របពេលដែលមនុស្សរាប់ពាន់នាក់បានប្រមូលផ្តុំគ្នានៅទីក្រុងប៊ែរឡាំង។ រីឯប្រទេសហូឡង់បានរាយការណ៍ថា ពលរដ្ឋរបស់ខ្លួន ៦នាក់ ត្រូវបានឃុំខ្លួន។ 

ក្រសួងការបរទេសហូឡង់បានអំពាវនាវឲ្យការពារអ្នកទាំងនោះ ខណៈដែលក្រុមអ្នកតវ៉ាបានប្រមូលផ្តុំគ្នានៅទីក្រុងឡាអេ។ ការិយាល័យការបរទេសរបស់ចក្រភពអង់គ្លេស បានបញ្ជាក់ពីការទាក់ទងជាមួយក្រុមគ្រួសារនៃជនជាតិរបស់ខ្លួនដែលជិះលើក្រុមនាវានោះ ហើយបានបញ្ជាក់ថា ខ្លួនរំពឹងថា អ៊ីស្រាអែលនឹងដោះស្រាយបញ្ហានេះដោយសុវត្ថិភាព។ ក្រៅពីនេះ ប្រទេសព័រទុយហ្គាល់ បារាំង និងអេស្ប៉ាញ បានថ្កោលទោសអ៊ីស្រាអែល និងបង្ហាញក្ដីបារម្ភ ចំពោះពលរដ្ឋរបស់ពួកគេ៕