អ្នកការទូតជាន់ខ្ពស់របស់បារាំង កាលពីថ្ងៃព្រហស្បតិ៍ (ទី២ ខែតុលា) បានប្រាប់បណ្ដាញសារព័ត៌មានថា ការដាក់ទណ្ឌកម្មឡើងវិញស្វ័យប្រវត្តិ នៅក្នុងការទណ្ឌកម្មរបស់អង្គការសហប្រជាជាតិ (UN) មិនមែនមានន័យថា ជាការបញ្ចប់ផ្នែកការទូតជាមួយអ៊ីរ៉ង់នោះទេ។

រដ្ឋមន្ត្រីការបរទេស លោក Jean-Noel Barrot (ហ្សង់-ណូអែល បារ៉ុត) បាននិយាយពីប្រទេសអារ៉ាប៊ីសាអ៊ូឌីត ជាកន្លែងដែលលោកកំពុងចូលរួមកិច្ចប្រជុំ ស្តីពីបញ្ហាសន្តិសុខពិភពលោក ដោយលោក Barrot ក៏បានការពារផងដែរនូវការចាប់ផ្ដើមឡើងវិញនូវកិច្ចសន្ទនារបស់បារាំងជាមួយទីក្រុងតេអេរ៉ង់ ជុំវិញកម្មវិធីនុយក្លេអ៊ែររបស់ខ្លួន។ លោកបានប្រាប់ថា៖ «បារាំងនឹងប្រឹងប្រែងឲ្យអស់ពីសមត្ថភាព ដើម្បីរកដំណោះស្រាយដែលទទួលយកបានទាំងអស់គ្នា»។

ជាមួយគ្នានេះ ក្រៅពីបញ្ហាទណ្ឌកម្មលើអ៊ីរ់ង់ លោក Barrot ក៏បានរំលឹកឡើងវិញផងដែរនូវការគាំទ្ររបស់ប្រទេសបារាំង ចំពោះផែនការរបស់ប្រធានាធិបតីអាមេរិក លោក Donald Trump ពាក់ព័ន្ធនឹងតំបន់ហ្កាហ្សា ដោយបញ្ជាក់ថា ទីក្រុងប៉ារីសបានត្រៀមខ្លួនរួចជាស្រេច ដើម្បី «ធ្វើការលើការអនុវត្តរបស់ខ្លួន ក្នុងគោលបំណងបញ្ចប់សង្រ្គាម ព្រមទាំងបំបាត់ភាពអត់ឃ្លាន និងការរងទុក្ខវេទនា នៅតំបន់ហ្កាហ្សា»។ 

តែយ៉ាងណាក្ដី លោកបានបដិសេធមិនវាយតម្លៃថា តើនឹងមានអ្វីកើតឡើង ប្រសិនបើក្រុមហាម៉ាសចា្រលចោលសំណើនេះ ហើយមិនឈានដល់កិច្ចព្រមព្រៀងនោះ៕