ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងបញ្ជាក់ថា សាលារៀនដែលមានទីតាំងនៅតាមព្រំដែន បានរងប៉ះពាល់ពីសង្គ្រាមជាមួយប្រទេសថៃ នៅមិនទាន់អាចបើកបវេសនកាលបាននៅឡើយទេ ដោយហេតុថាស្ថានភាពនៅព្រំដែនមិនទាន់មានស្ថិរភាព។
ឯកឧត្ដមបណ្ឌិតសភាចារ្យ ហង់ជួន ណារ៉ុនថ្លែងលើកឡើងយ៉ាងដូច្នេះក្នុងឱកាសដឹកនាំកិច្ចប្រជុំ ស្ដីពីការត្រៀមបើកបវេសនកាលឆ្នាំសិក្សា ២០២៥-២០២៦ នាព្រឹកថ្ងៃទី៣ ខែតុលា ឆ្នាំ២០២៥នៅវិទ្យាស្ថានជាតិអប់រំ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។
មុនឈានចូលកិច្ចពិភាក្សា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងពីបច្ចុប្បន្នភាព និងវឌ្ឍនភាពការងារអប់រំ ដោយគូសរំលេចពីលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៥ កន្លងទៅថ្មីៗនេះ ដែលមានអត្រាប្រឡងជាប់កើនឡើងដល់ទៅ ៨៤% ជាមួយកំណើនអត្រាសិស្សជាប់និទ្ទេស A។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ថ្លែងបញ្ជាក់ថា ពាក់ព័ន្ធនឹងការត្រៀមបើកបវេសនកាលឆ្នាំសិក្សាថ្មីនៅដើមខែវិច្ឆិកាខាងមុខនេះ សម្រាប់សាលារៀនដែលមានទីតាំងនៅតាមព្រំដែន បានរងប៉ះពាល់ពីសង្គ្រាមជាមួយប្រទេសថៃ នៅមិនទាន់អាចបើកបវេសនកាលនៅទីតាំងសាលរៀនបាននៅឡើយទេ ដោយហេតុថាស្ថានភាពនៅព្រំដែនមិនទាន់មានស្ថិរភាព ធ្វើឱ្យក្រុមការងារបោសសម្អាតមីន និងសាងសង់មិនអាចចូលទៅស្តារឡើងវិញបាន។ យ៉ាងណមិញ ក្រសួងបានត្រៀមជាស្រេចនូវកញ្ចប់ថវិកាស្តារឡើងវិញនូវសាលារៀនរងប៉ះពាល់នៅតាមព្រំដែន ដែលក្នុងនោះមានថវិការបស់ក្រសួងផ្ទាល់ និងមានការចូលរួមឧបត្ថម្ភពីសំណាក់ដៃគូអភិវឌ្ឍ សប្បុរសជនជាតិ និងអន្តរជាតិផងដែរ។
កិច្ចប្រជុំនេះបានពិនិត្យពិភាក្សាផ្លាស់ប្ដូរយោបល់លើរបៀបវារៈ ១) ការអនុវត្តគន្លងអប់រំថ្មី ២) ផែនការពង្រីកមធ្យមសិក្សា ៣) ការត្រៀមសម្រាប់ការបើកបវេសនកាល ឆ្នាំសិក្សា ២០២៥-២០២៦ និង ៤) គម្រោងផែនការសាងសង់ និងជួសជុលអគារសិក្សានៅតាមព្រំដែន ៥) កិច្ចពិភាក្សាដើម្បីសម្រេចអនុម័តលើផែនការសកម្មភាពសំខាន់ៗដែលត្រូវអនុវត្តបន្ត។ តបតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងអប់រំ យុវជន និងកីឡា នឹងចាប់ផ្តើមអនុវត្តកម្មវិធីអប់រំតម្រង់ទិសការសិក្សា ដល់សិស្សានុសិស្សចាប់ពីថ្នាក់ទី៧ ដល់ថ្នាក់ទី៩ នៅអនុវិទ្យាល័យ និងវិទ្យាល័យនានា។ ក្រសួងនឹងសាកល្បងអនុវត្តគន្លងអប់រំថ្មីរួមមាន គន្លងវិទ្យាសាស្រ្ត វិទ្យាសាស្រ្តសង្គម និងគន្លងវិជ្ជាជីវៈ ចាប់ពីថ្នាក់ទី១០ នៅតាមវិទ្យាល័យគោលដៅមួយចំនួន សម្រាប់ឆ្នាំសិក្សា ២០២៥-២០២៦នេះ។
ដើម្បីជំរុញប្រសិទ្ធភាពការងារ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍មួយចំនួនដល់ក្រុមការងារ ដូចជា (១) សូមរៀបចំផែនការលម្អិតពីតម្រូវការជាក់ស្តែងពាក់ព័ន្ធនឹង ការបើកបវេសនកាលឆ្នាំសិក្សាថ្មី ផែនការក្នុងការពង្រីកមធ្យមសិក្សា និងការអនុវត្តសាលល្បងនូវគន្លងអប់រំថ្មី សម្រាប់ឆ្នាំសិក្សា២០២៥-២០២៦ (២) ផែនការសកម្មភាពសាងសង់ និងស្តារឡើងវិញសាលារៀនដែលរងប៉ះពាល់ (៣) សូមប្រមូលទិន្នន័យសិស្ស និងគ្រូឱ្យបានច្បាស់លាស់ (៤) រៀបចំរបាយការណ៍លម្អិតពីបច្ចុប្បន្នភាពស្ថានភាពសាលារៀន និងទីតាំងសម្រាប់ដំណើរការបង្រៀនបណ្ដោះអាសន្ន (៥) សម្រាប់ការផែនការពង្រីកការពង្រីកមធ្យមសិក្សា សូមបន្តបញ្ចូលវិធីសាស្ត្របង្រៀនថ្មីទៅការរៀន និងបង្រៀន ដោយចាប់ផ្តើមពីសាលារៀនគំរូ និងបន្តជំរុញគម្រោងពង្រីកសាលារៀនជំនាន់ថ្មី។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះលទ្ធផលការងារប្រកបដោយវឌ្ឍនភាពរបស់ក្រុមការងារ និងស្នើឱ្យនាយកដ្ឋានក្រោមឱវាទក្រសួង បង្កើតសម្ព័ន្ធមេត្រីភាពជាមួយសាលារៀនតាមខេត្ត ដើម្បីជំរុញការជួយគាំទ្រឱ្យកាន់តែមានប្រសិទ្ធភាព និងសូមឱ្យបន្តខិតខំប្រឹងប្រែងសហការគ្នាអនុវត្តការងារ និងគម្រោងដែលមានស្រាប់ឱ្យកាន់តែល្អប្រសើរដោយត្រូវសម្រេចឱ្យបាននូវសមិទ្ធផលថ្មីៗជាច្រើនបន្ថែមទៀត ជាពិសេសត្រូវផ្តោតបន្តជំរុញកំណែទម្រង់គ្រឹះស្ថានបណ្តុះបណ្ដាលគ្រូឱ្យកាន់តែជោគជ័យ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
